Көзгә сарымсак утыртабыз

Төп ориентир – тотрыклы салкыннарга якынча өч-дүрт атна калырга тиеш. Урта полоса өчен гадәти вакыт – сентябрь ахырыннан октябрьнең беренче яртысына кадәр. 
Көзге сарымсакны кыяр, томат, ташкабак, кәбестә, салат һәм кузаклылар үскән урынга утырту  яхшы.
Туфракны алдан әзерлиләр: чүп үләннәреннән чистарталар, казыйлар. Казыр алдыннан өлгергән компост яки черемә, көл кертәләр. Яңа тирес ярамый. Туфрак утырсын өчен ике-дүрт атна вакыт кирәк.
Утырту өчен тыгыз, сәламәт һәм эре яки урта сарымсак тешләрен сайлап алалар. Аларны калибрлау файдалы – бер үк зурлыкта булганнар  бервакытта өлгерәләр.
Утырту өчен яраклы схема –  рәтләр арасында 25 см һәм үсемлекләр арасында 10-15 см. Тирәнлеге авыр туфракта 4-6 см, җиңел туфракта 6-8 см. 
Салкынча һава торышы урнашкач, түтәлне черемә, искергән такта чүбе белән капларга мөмкин. 
2026 елда көзге сарымсак утырту өчен уңайлы көннәр – 13-17, 19, 27, 28 һәм 31 октябрь. Әгәр календарь датасы һәм реаль һава торышы аерылса, һава торышын сайлагыз.