"Яңа гасыр" телеканалының радио буенча генераль директор урынбасары һәм "Болгар радиосы" баш мөхәррире Илнур Фәйзрахмановның бу вазыйфалардан китүе турында язган идек. Әлеге хәлгә ел ярым вакыт узган. Бу аралыкта Илнур Фәйзияздан улы Татарстан Диния нәзарәте карамагындагы "Азан" интернет-радиосында баш мөхәррир булып эшләп алды. Һәм менә тагын яңа вазифага күчкән.
Хәзер ул "Татарстан" дәүләт телерадиокомпаниясенең Милли тапшырулар редакциясе шеф-мәхәррире. "Матбугат.ру"га сөйләвенчә, яңа эшкә аны каналның җитәкчесе Фирдүс Гыймалтдинов чакырган. Ни кызык, бу инде шундый икенче чакыру. Тарих кабатлана. 1998нче елда, әле Фирдүс әфәнде хәбәрләр тапшыруларын алып баручы булып эшләгән вакытта И.Фәйзрахмановны ТРТ каналына кодалап караган инде. Илнур берара ТВда спорт хәбәрчесе булып эшләп тә ала. Тик ул вакытта "Шәһри Казан" газетасы баш мөхәррире Илдус Илдархановның ышандыру көче ныграк булган, күрәсең.
Озак еллар FM-радиода эшләгән Илнурга интернет-радиода хезмәт куюы күңелсез булмаган. "Күп максатларга ирешелде, - ди ул. - "Азан" "Таттелеком" кабельле челтәренә керде. Хәзер аны "Летай" әбүнәчеләре дә тыңлый ала. Интернетта тыңлаучылар саны исә 2015 елда 900 мең чамасы булса, 2016 елда 1,9 млн исәпләнә. "Азан" радиосын көн дәвамында 8-9 меңгә якын кеше тыңлый. 200-300 кеше онлайн утырыра".
Яңа эшендә Илнур Фәзрахманов "Татарстан" дәүләт телерадиокомпаниясе чыгаручы әдәбият, мәдәният, сәнгать, социаль темаларга караган тапшырулар өчен җаваплы. Аларга ул яңа сулыш өрмәкче. Телевизор караучыларга яхшы таныш тапшырулар бу: "Халык җәүһәрләре", "Мир культуры", "Музыкальная жизнь", "Замандаш" циклыннан тапшырулар. Алар сишәмбе, пәнҗешәмбе, җомга көннәрне эфирга чыга. Шулай ук Татарстан Диния нәзарәтенә 25 ел тулу уңаеннан фильм төшерү өстендә эш алып барыла икән. +
Сүз уңаеннан, "Татарстан" дәүләт телерадиокомпаниясеннән иң олпат журналистларның берсе Лия Заһидуллина китә дигән хәбәр дә бар. Илнур Фәйзрахманов аның урынына килмәде микән? "Юк, - дип җавап бирде Илнур Фәйзияздан улы, - Аның урынына түгел. Лия Михайловна минем җитәкчем санала. Хәзергә ул больничныйда, эшкә чыгу-чыкмавын мин белмим, чөнки әлеге мәсьәлә минем карамакта түгел".
Лия Заһидуллинаның каналдан китүе дөресме дип компаниянең җитәкчесе Фирдүс Гыймалтдиновтан да сорадык. Әмма ул комментарий бирүдән баш тартты.
Нет комментариев