Вазыйх Фатыйхов каләменнән:"Без бер адымда ялгыштан"

Без бер адымда ялгыштан,

Хәфеннән, сагыштан.

Югалтканнар янәшәдә,

Бар мизгелләр ялгышкан.

Бары бер генә адым шул-

Уй- фикернең арасы.

Кайчак серле караштан да,

Сукыр булып каласың.

Бары бер адым үлчәме-

Әнә генә , хыялың?

Аңламыйсың шул гомернең,

Бер куш учка сыйганын.

Бер адымда ялгышасың,

Уфтанасың , соң була.

Бәхет кошың учларыңда,

Шул арада юк була.

Бер адымда кеше җаны,

Төрләнәдер меңнәргә.

Бер ялгышка гомер буе,

Туры килә түләргә..

Кем соң белми , бер адымннан,

Үзгәргәнен язмышның.

Күргәнем бар күз яшьләрен-

Бер минутлык ялгышның.

Бер адымда кеше елый,

Икенчесендә көлә.

Һәр адымының кыйммәтен ,

Кеше тик соңлап белә.

Бер ялгыш адымы өчен,

Үкенгәннәр аз әллә.

Күпләребез бүгенге көн,

Яшибез шушы хәлдә.

Вазыйх Фатыйхов.

Фото: vladtime.ru