Су спорты төрләре буенча XVI дөнья чемпионатының Казанда узачагы 2011 елның 15 июлендә билгеле булды. Татарстан башкаласы Мексиканың Гвадалахара шәһәрен һәм Гонконгны артта калдырып, ФИНА вәкилләренең ышанычын яулады.
Ярышлар 6 спорт төре буенча уза. Ачык суда йөзү буенча ярышлар - 25 июль-1 август, синхрон йөзү - 25 июль-1 август, суга сикерү - 24 июль-2 август, су полосы - 26 июль-8 август, хай-дайвинг - 3-8 август, ә йөзү 2-9 август көннәрендә үткәреләчәк.
Чемпионатта 75 комплект медаль уйнатылачак. Ярышларда 190 илдән 2 923 спортчы һәм 1 490 рәсми зат катнашыр дип көтелә. (Чагыштыру өчен: 2009 елда Италия башкаласы Римда узган чемпионатта 185 илдән 2 500 спортчы катнашса, 2013 елда Испаниянең Барселона шәһәрендә үткән уеннарда 177 илдән 2 195 спортчы чыгыш ясаган). Казандагы чемпионатта 198 хөкемдар эшләячәк.
Ярышлар 4 спорт объектында үткәрелә. 10 990 тамашачы сыйдырышлы "Казан Арена" стадионында - йөзү һәм синхрон йөзү, Су спорты төрләре сараенда исә суга сикерү буенча ярышлар уздырыла. Әлеге бина 3600 тамашачыны сыйдыра. Су полосы өчен әзерләнгән 3 650 кешелек махсус аренада су полосы буенча ярышлар үтсә, 3 800 кеше сыйдырышлы "Казанка" аренасында хай-дайвинг һәм ачык суда йөзү буенча көч сынашачаклар. Күнегүләр уздыру өчен өстәмә объектлар да каралган. "Буревестник", "Олимп", "Оргсинтез" һәм "Акчарлак" бассейннары - әнә шундыйлардан.
http://intertat.ru/tt/sport-tt/item/46671
Нет комментариев