Дәү әни дә бервакыт чегәннәр корбаны була язды. Бәхеткә, капкасыннан ике чегән хатынының кереп киткәнен күршеләре күреп кала. Алар килеп кергәндә, дәү әни инде җыйган акчасын диванга чыгарып салган, колак алкасын салырга керешкән була.
Соңыннан елый-елый сөйләгәне истә. "Берни белмим, гипнозладылар", - ди. Акчасының төгәл суммасына кадәр әйтә. Күршеләренең керүен дә сизә. "Нурәхмәт тавышыннан гына айнып киттем", - ди. Күрәсең, ир-ат тавышы аны бу халәтеннән чыгара.
Авылларда чегәннәр инде хәзер сирәк күренә. Тик шәһәрдә һаман да очрап торалар. Мәсәлән, сентябрьдә күкрәк баласы күтәреп, ипи-сөткә дип акча теләнгән хатынның баласы ел дәвамында "үсмәде". Гадәттә, бала ун айдан тәпи китә. Ә бу хатын исә һаман шул баласын күкрәгенә кысып утыра. Юри күзәткәнем бар: ун узучының бишесе генә булса да хәер бирми китми. Акмаса да тама бит, сигез сәгать буе бил бөгеп кайтасы юк.
Чыганак: intertat.ru
Нет комментариев