Туган көн үткәрәсе килә, ә дин буенча ярамый. Нишләргә? [дин вә йола]

 — Дөрестән дә, дин юлына баскач, тормышны ак белән карага, ягъни ярый-ярамыйга бүлүчеләр бар. Кемдер гомере буе туган көнен уздырып яши дә, намаз укый башлагач, бәйрәм итүне туктата, берәрсе котласа: “Исламда туган көн юк”, — дип кырт кисә. Хәзрәтләр дә туган көн белән бер-берсен тәбрик итә һәм монда хилафлык юк. Бүләк бирү дә — күркәм гамәл. Пәйгамбәребез (с.г.в.): “Бүләкләр бирешегез. Ул араны якынайта”, — дигән. Туган көнне үткәрергә ниятләсәк, хәләл итеп уздырыйк. Гомер дә, вакыт та — Аллаһның нигъмәте. Аларны сатып алып та, кире кайтарып та булмый. Шуны белик: туган көн безне йә җәннәткә, йә җәһәннәмгә якынайта. Шулай ук алтын урталыкны онытырга ярамый. Алайса, кайберәүләр арттырып җибәрә — бәйрәмнәрен бик зурлап уздыра һәм бу масаю, тәкәбберләнү кебек гөнаһка кертергә мөмкин. Чаманы белмичә мактап, булмаган сыйфатларны өстәп, кешене бозуыбыз бар.

Зәлия САБИРОВА.

pixabay.com фотосы

http://nashcheremshan.ru/news/din-ham-tormyish/tugan-kn-tkrse-kil-din-buencha-yaramyy-nishlrg-din-v-yola