Штрафлар күләме артты

Газета укучыбызның бу соравына район ЮХИДИ бүлегенең административ практика буенча инспекторы Руслан Хәмәтвәлиев җавап бирә:

-Билгеле булганча 1 сентябрьдән Россия Федерациясенең административ хокук бозулар кодексына шактый үзгәрешләр кертелде. Юл-транспорт кагыйдәләрен бозган өчен җаваплылык катгыйланды, штрафлар күләме арттырылды. Сезнең очракка килгәндә билгеләнгән тизлекне 20 км.сәгатьтән дә күбрәккә арттыргансыз, ягъни кодексның 12.9 маддәсе 2 нче бүлеген бозгансыз булып чыга. Ә тизлек арттырган өчен 100-300 сумлык штрафлар бөтенләй бетерелде. Хәзер билгеләнгән тизлекне сәгатенә 20 км.дан арттырганда гына җаваплылыкка тарталар. Тизлекне сәгатенә 40 км.га (әмма 60 км.сәг-тән артык түгел) арттырган өчен 1000-1500 сум, 60 км.дан арттырган өчен (әмма 80 км.сәг-тән артык түгел) 2000-2500 сум штраф яки 4 айдан 6 айга кадәр машина йөртү таныклыгыннан мәхрүм итү каралган. Ә билгеләнгән тизлекне сәгатенә 80 км.дан да күбрәккә арттыручыларга 5000 сум күләмендә штраф түләргә яки 6 айга кадәр машина йөртү таныклыгыннан мәхрүм калырга туры киләчәк.

Руль артына исерек хәлдә утыручыларга да җаваплылык шактый катгыйланды. Хәзер сәрхүшләргә 30 мең сум штраф һәм 1,5 елдан алып 2 елга кадәр таныклыгын алу каралган. Икенче тапкыр кабатланса штраф 50 мең сум һәм 3 елга таныклыгы алына.

Куркынычсызлык каешын эләктерми йөргән өчен штраф күләме 1000 сумга кадәр арттырылды. Транспорт йөртү хокукы булмаган килеш руль артына утырган өчен 5 мең сумнан алып 15 мең сумга кадәр штраф каралган.

Транспорт чарасын йөрткәндә телефоннан сөйләшү 1500 сум штраф белән бәяләнә.

Башка төр юл-транспорт кагыйдәләрен бозган өчен дә штрафлар күләме шактый арттырылды.