Балык Бистәсендә Җиңү бәйрәме (яңа фотолар)

Иртәдән үк һәр авылдагы, район үзәгендәге һәйкәл һәм обелискларга Почетлы саклаучы куелды. Район үзәгендәге мәйдан фронтовиклар фотосы белән бизәлгән. Сугыш чоры җырлары яңгырый. "Яшь гвардия" җәмәгать оешмасы активистлары сугыш, тыл ветераннары һәм бәйрәмгә килүчеләрнең һәрберсенә дә «Георгиевский лента» тараталар. Мөнбәр каршына оешма, предприятие, район үзәге учреждениеләре коллективы, парадта катнашучылар тезелеп баскан. Сәгать уннарда балыкбистәлеләр сугышта һәлак булучыларны искә алырга, ветераннарны бәйрәм белән котларга җыелдылар.

"Үлемсез полк" акциясендә катнашырга чакыру мөрәҗәгате яңгырый: "9 май-Бөек Җиңү көнендә сугыш кырында һәлак булучы солдатлар безнең хәтердә булсын. Һәрбер йортка, һәрбер гаиләгә безнең бабайлар кайткан сыман тоелсын".

Бәйрәм тантанасы митингы "Кама йолдызчыклары" хореографик коллективының "Река времени" биюе белән башланып китте. Аннан соң Россия Федерациясе гимны яңгырады. Район башлыгы Илһам Валеев барысын да бәйрәм белән котлады. Һәр ветеранга хөрмәт йөзеннән чәчәкләр бүләк ителде. Бәйрәм тантанасында хезмәт, эш белән тәэмин итү һәм социаль яклау министрының беренче урынбасары Марат Гафаров, хәрби комиссариат бүлеге җитәкчесе Фәрит Ваһапов, Ленинград блокадасында булган Минниса Шәйхетдинова, районның "Әфган" ветераннар советы председателе Илдус Моталлапов, яшь буын вәкилләреннән гимназия укучысы Эмиль Сафин да чыгыш ясады. «Кызыл Армия Европа халкын нацизмнан азат итте», «Бу безнең барыбызның да бәйрәме", "Сугышта батырларча һәлак булучыларга баш иябез", "Һәр йөз катнашучының өчесе генә исән калган", "Рәхмәт сезгә җиңү бүләк иткән өчен", - дигән сүзләр әйтелде алар чыгышында.

Митингтан соң мәктәп укучылары бабалары-фронтовиклар портреты күтәреп үзәк юлдан үттеләр. Алар артыннан атлап баручы бер төркем күккә зәңгәр төстәге 500 шарны җибәрде. Аннан соң бер минутлык тынлык игълан ителде. Янәшәдәге һәйкәл янында Казан шәһәреннән килгән "Витязь" хәрби клубы әгъзалары винтовкадан залп яңгыраттылар. Район җитәкчеләре, оешма, предприятие коллективлары һәйкәл каршына гирлянда, чәчәкләр куйдылар. Подполковник Фәрит Ваһапов район башлыгына катнашучыларның бәйрәм парадына әзер булуларын җиткерде. Көй яңгырады. Парад байрак йөртүче - район эчке эшләр бүлеге хезмәткәрләренең йөрешеннән башланды. Алардан соң Руслан Нәбиуллин җитәкчелегендә "Смотр песни и строя" республикакүләм конкурсының район турында җиңүчеләр - икенче номерлы мәктәпнең алтынчы сыйныф укучылары атлады. Алар артыннан Россиякүләм, республикакүләм олимпиада, конкурслар, спорт ярышларында, "Созвездие-Йолдызлык" бәйгесендә җиңү яулаучы гимназия укучылары килде. Бәйрәмгә ямь өстәп Татарстан Республикасы милли музее базасында сакланган Владислав Хабаров җитәкчелегендәге флаглар белән бизәлгән машина һәм мотоцикллар колоннасы үтте. Мәйданда концерт программасы башланды.

Таңсылу Минһаҗева.

Игорь Пузырьков фотолары.