Радик Ислямов Җиңү көне белән котлый
Хөрмәтле балыкбистәлеләр! Кадерле сугыш ветераннары һәм тыл хезмәтчәннәре!
Ел саен 9 май — Бөек Җиңү көнендә Ватаныбыз күгендә бәйрәм салютлары атыла. Бу Җиңүнең халкыбызга бик кыйммәткә төшүен еллар узган саен ныграк аңлыйбыз. Миллионлаган ватандашларыбызның гомере бәрабәренә яуланган тынычлыкны балаларыбыз, оныкларыбыз, алардан соң киләчәк буыннар өчен саклап калу—безнең төп бурычыбыз.
Бу бәйрәмдә—илебезнең тарихы, һәр гаиләнең югалту ачысы, сугыш чорында батырлык күрсәткән күп милләтле халкыбыз өчен горурлык чагыла. Без Ватан сакчылары батырлыгы алдында баш иябез.
Җиңү хакына бөтен көчләрен биргән Бөек Ватан сугышы ветераннарына, тыл хезмәтчәннәренә, сугыш чоры балаларына чиксез рәхмәтебезне белдерәбез.
Барыгызга да чын күңелемнән сәламәтлек телим, якыннарыгызның игътибарын, кайгыртучанлыгын тоеп яшәгез.
Бөек Җиңү көне белән!
Радик Ислямов,
муниципаль район башлыгы.
Следите за самым важным и интересным в Telegram-каналеТатмедиа