Балтач авылыннан  Нияз Гыйлемҗанов бронза медаль яулап алды.

Безнең районның Балтач авылыннан  Нияз Гыйлемҗанов бронза медаль яулап алды.

Бу аның спортта беренче җиңүе генә түгел. Уңышка ирешү өчен ул даими рәвештә татарча һәм ирекле көрәш төрләре белән шөгыльләнә, район җыелма командасы составында чыгыш ясый.

Хәзерге вакытта Нияз район Агротехникумында укый, шул ук вакытта  тренеры Айназ Якупов кул астында, көрәш клубында шөгыльләнә. Һәм менә нәтиҗәсе буларак ярышта өченче урынны ала.

-Нияз өметле көрәшче. Көрәш алымнарына үзвакытында аны тренер Рафыйк Мөхәммәтшин өйрәткән. Хәзерге вакытта атнага ике тапкыр безнең көрәш клубына йөреп минем күзәтү астында шөгыльләнә. Бу ярышларда катнашу өчен ике атна ныклап күнегүләр үттек, кагыйдәләрен өйрәндек.

Сумо  буенча ярыш - көрәшчеләрнең  үзара көч алышуы белән аерылып тора. Нияз 4 көрәштә катнашып, берсендә оттырды һәм өченче урынны яулады. Бу көннәрдә ул ирекле көрәш буенча үз үлчәү категориясендә Татарстан беренчелегенә әзерләнә,- диде Айназ Якупов.

Тренер булып Айназ 2017 нче елдан бирле эшли. Ирекле көрәш буенча Бөтенрәсәй турнирында өченче призлы урынны ала, 2012-2013 нче елларда югары уку йортлары студентлары арасында ирекле көрәштә Татарстан чемпионатында ике тапкыр финалга чыга. Үзенең уңышлары өчен тренерлары, күп тапкыр Сабантуйның абсолют батыры Габделхәй Галиуллин, Бөтенрәсәй һәм республика турнирлары призеры Илназ Шакировка, күп тапкырлар Сабантуй батыры һәм республика турнирларында призлы урын  яулаган Рафыйк Мөхәммәтшинга рәхмәтле.

Менә шулай танылган көрәшчеләрнең шәкертләре районыбыз данын яклауны дәвам итәләр. Алар яшь көрәшчеләргә бөтен белемнәрен, күнекмәләрен җаннары-тәннәре белән җиткерәләр. Ә соңгылары моның шулай икәнен исбатлыйлар.