Ифтар мәҗлесе үткәрү - саваплы гамәл
Узган атна азагында “Үзәк” мәчеттә чираттагы ифтар мәҗлесе булып узды. Ахшам намазы алдыннан Казан шәһәренең “Бишбалта” мәчете имам-хатыйбы, элеккеге Татарстан Диния назарәте җитәкчесе Госман хәзрәт Исхакый биредә җыелучылар алдында эчтәлекле вәгазь сөйләде.
Авыз ачып, намаз укыганнан соң мәхәллә халкы, кунаклар мәчетнең икенче катында әзерләнгән табынга уздылар.
Бу көнне табынны Раил Бариев һәм Айрат Сафин кебек иганәчеләр исеменнән оештырганнар иде.
Кунаклар арасында мәхәллә халкы белән беррәттән район һәм төрле оешмаларда җитәкчеләр булып эшләп, район икътисадына лаеклы өлешләрен керткән шәхесләр дә катнаштылар.
Соңыннан барысы да махсус хәрби операциядә катнашучылар, илебез, республика җитәкчеләре һәм халкы исәнлегенә, тынычлык урнашуны теләп дога кылдылар.
-Ифтар ашларын уздырыр өчен хәләл ит белән кардәшләребез тәэмин итте, исемнәрен әйтмәүне үтенделәр. Дүрт пешекчебез бар, зур ашлар үткәргәндә алар тәмле ризыклар пешереп табын әзерлиләр, савыт-сабаларыбыз да бөтен кешеләргә җитәрлек. Бик зур рәхмәт аларга.
Барлык райондашларны якынлашып килүче Ураза бәйрәме белән котлыйм, дөньяларыбызга тынычлык, барыбызга да исәнлек-саулык һәм бәрәкәт телим,-диде Үзәк мәчет имам-хатыйбы Хәмит Идрисов.
Автор Нияз Шәйдуллин
Следите за самым важным и интересным в Telegram-каналеТатмедиа