Ямаш авылында хоккей яхшы популяштырылган спорт төре

Ямаш авылында хоккей яхшы популяштырылган спорт төре. Моннан тыш чаңгы, футбол, теннис та биредә киң колач җәйгән. Мәктәп яшеннән алып өлкәннәргә кадәр әлеге спорт төрләрен үз итә. Шулай булмый ни, биредә алар белән шөгыльләнү өчен барлык мөмкинлекләр дә тудырылган. Авылда 2014 елда районда беренчеләрдән булып ясалма өслек белән универсаль спорт мәйданчыгы эшләнгән. Мәктәп базасында хоккей мәйданчыгы, территориясендә ике футбол кыры бар. Шулай ук фотозоналары белән яктыртылган чаңгы трассасы ясалган. Мәктәп укчылары, авыл яшьләреннән җыелган команда белән кышын - хоккей, җәен футбол уйныйлар.

 -1995 елда бирегә эшкә кайткач, мәктәп укучылары һәм авыл яшьләре арасында хоккей һәм футбол командаларын оештырып җибәргән идем. Бүгенге көндә яшьләр арасындагы команда составын - 18 һәм аннан югары яшьтәге авыл егетләре тәшкил итә, берничәсе район үзәгеннән килеп йөри. Барлыгы егермегә якын кеше.  Инсаф Баһавиев – әлеге командаларның капитаны булып тора. Ул мәктәптә тренер булып эшли, - дип сөйләде Ямаш мәктәбе директоры Алмаз Баһавиев.

Шушы көннәрдә Теләче районы Шәтке авылында оештырылган районара турнирда катнашып икенче урынга лаек булган ямашлылар. Әлеге ярышта уенчыларның берсе -  Рәлиф Фатыйхов иң яхшы сакчы дип табылган. (Сүз уңаеннан, физкультура академиясенең хоккей факультетын тәмамлаган егет ул).  Күптән түгел генә Арчада узган районара турнирда район җыелма командасы өченче урынны алып кайткан булган. Шулай ук агымдагы елда Аксубай районында узган “Алтын алка” ярышында район җыелма командасында Ямаш мәктәбе укучылары да уңышлы гына катнашкан.

 Әйе, һәр эштә теләк һәм тырышлык кына кирәк. Ямашлыларның уңышлары да  бихисап. Бердәм булганда барысын да булдырабыз, дигән девиз белән яши алар.  Шуны да әйтеп узарга кирәк,  узган ел район хоккей турнирында катнашып район башлыгы кубогына ия булалар. Районкүләм оештырылган спорт ярышларында алдынгылыкны бирмиләр. Яшь төркеме буенча район җыелма командасында уйныйлар. Шулай ук футбол ярышларында актив катнашалар. Ике ел рәттән район башлыгы кубогына ия булганнар. Җыелма командада уйнаучы Ямаш егетләре ел әйләнәсендә “Идел буе хоккей лига”да уйныйлар икән. “Безнең укучылар алга таба тормышларын спорт белән бәйләп китәләр. Егермегә якын укучым физик-культура факультетларын тәмамлады. Бүгенгесе көндә алар ярышларны уздырырга ярдәм итә. Самара өлкәсенең хоккей клубы җитәкчесе Фәрит Хәсәнов һәрвакыт ярдәм күрсәтеп килә. Тегермәнлек авылы егете ул. Хоккей командасына киемнәр белән булышып тора. Киләчәктә Ямашта яңа хоккей коробкасы булдыру турында уйлыйбыз,” - дип планнары белән уртаклашты Алмаз Баһавиев.