Илназ Минвәлиев тамашачыларны яңа җырлары белән сөендерә

Җыр сәнгате үзе зур дөнья. Сүзем-моңлы җырлары белән халкыбыз күңелен яулаган, районыбыз данын еракларга таратучы җырчы егетебез Илназ Минвәлиев турында. Танылган җырчы булуына дистә елдан артык вакыт узып та киткән. Бүгенге көндә горурланып сөйләрлек эш-гамәлләре бар. Күңеле җыр-моңга тартканга үз тырышлыгы белән танылган җырчы дәрәҗәсенә күтәрелә.

Ямьле май аенда (20 майда) киң күңелле, олы йөрәкле популяр җырчыбызга 35 яшь тула. Үз төркемен булдырып иҗат итүенә-10ел. Шул еллар эчендә дистәдән артык чыккан дисклары, хит-парадларда яулаган алдынгы урыннары, Болгар премиясенә лаек булулары-тырыш, тынгысыз хезмәтенең нәтиҗәсе. Радио-телевидение хезмәткәрләренең хөрмәтле кунагы булуын да яшерми. Ел саен эчтәлекле җырлары белән яраткан тамашачысын сөендерә. Моңлы тавышлы Илназны бигрәк тә өлкән буыннар ярата. Концертлары һәрчак тулы залларда уза. Көчле, кабатланмас моңлы тавышлы булганы, элеккеге халык җырларын җиренә җиткереп башкарганы өчен ярата аны өлкәннәр. Залларны бизәп өлкән яшьтәгеләрнең утыруына үзе дә сөенә. Илназ эчтәлекле, заманча җырларны йөрәге теләгәнчә сайлый һәм халкыбыз тарафыннан яратып кабул ителә. Быел иҗат иткән яңа җырлары "Ярдәмләшеп яшик", "Изге теләк", "Кадерен белеп яшә" җырларының исемнәре дә нәкъ шуны сөйли. Бар иҗат иткән җырлары, күңеленнән чыккан моңнары радио-телевидение аша еш җырлатыла, халык сорый, зурлый аны. Хәйрия чараларында еш катнашуы да җырчыбызны бизи. Иң мөһиме-туган ягына гашыйк. Кайларга гына барса да, Балык Бистәсе ягыннан булуы белән горурлануын яшерми. Халкын,танылган кешеләрен хөрмәт итә, яратып искә ала. Иҗат төркеме белән бәйрәмнәренә ашкынып кайта.Гомер юлларында очраган һәркемгә рәхмәтле ул.

Остазы-Хәмдүнә апа Тимергалиевага җыр дөньясына кертеп җибәрүе өчен гомере буе рәхмәтле булуын, Фәрит абый Хатыйповны бүләк иткән эчтәлекле, матур җырлары өчен ихтирам итүен горурланып сөйли. Хәмдүнә апа үзе дә Илназның тырыш, моңлы җырчы булуын, аны яратуын яшерми. Илназ турында әңгәмәсендә : "Минем Илназым үзе тырыш булды. Бигрәк тә җыр өлкәсендә үзең тырыш булмасаң, моңың булмаса бернинди ярдәм дә тия алмый,"- ди. Илназның үз укучысы буларак танылган, популяр җырчы булып китүенә сөенеп, матур киләчәгенә ышанып яши Хәмдүнә апа. Бер-береңне хөрмәт итеп, ярдәмләшеп яшәүгә ни җитә! Яраткан гаиләсе, өч улы-аның терәге. Әти-әнисен, туганнарын, дусларын хөрмәт итеп яши җырчыбыз. Гаиләләре белән җыелышып 14 май көнне яраткан әнисе Разыя Зыя кызының-63, абыйсы Илһам Рәшит улының 40 яшьлек туган көннәрен матур итеп үткәреп җибәрделәр.

Киң күңелле Илназыбыз 1 июнь көнне Казандагы "Астория" ресторанына сәгать кичке җидедә бар дусларын, туганнарын, килергә теләгән һәр кешене үзенең туган көненә, юбилей кичәсенә чакыра. Анда танылган җырчыларыбыз катнашында матур тамаша узачак. Тырыш, максатына омтылучан якташыбызны күркәм юбилее белән котлыйбыз. 35 яшь-нәкъ яңа эш-гамәлләргә омтылган егет чак кына. Киләчәктә Илназыбыздан матур җырлар, игелекле эш-гамәлләр көтеп калабыз. Иҗат уңышлары беркайчан саекмасын, сәламәтлек, гаилә бәхете, озын гомер, бәхетле-шатлыклы тормышлар телибез.

Закирова Альбина.

Яр Чаллы.