Республиканың электрон мактау тактасын республика халкы август башында күрәчәк

 Бу хакта бүген ТР Хезмәт, мәшгульлек һәм социаль яклау министры Эльмира Зарипова төбәкнең идарә үзәгендә туры эфирда хәбәр итте.

Электрон мактау тактасын формалаштыруда төбәкнең 4 900 предприятиесе, шул исәптән Татарстанның Система ясаучы сәнәгать флагманнары катнашты. Бүгенге көндә анда 15 300 кеше тәкъдим ителгән. Мәгълүматлар ел саен яңартылачак.

Электрон мактау тактасын быелның 1 маенда Татарстан рәисе Рөстәм Миңнеханов гамәлгә куйды. Проект республика халкының һөнәри казанышларын, аларның намуслы хезмәтләрен һәм Татарстанның социаль-икътисадый үсешенә керткән өлешләрен билгеләп үтәргә тиеш.