Коточкыч янгын: ике гаилә бер мизгелдә йортсыз калган
Кукмара районының Югары Арбаш авылында булган зур янгын ике гаиләне бөтен мөлкәтсез калдырды. Таҗмиевлар һәм Ярмөхәммәтовларның йортлары, хуҗалык корылмалары, техникасы һәм мал-туарлары ут эчендә юкка чыккан.
8 май көнне тыныч кына башланган авыл тормышын төштән соң чыккан янгын астын-өскә китерә. Ут Гөлфинур һәм Фәнил Таҗмиевларның хуҗалыгыннан башлана. Ул вакытта гаилә башлыгы эштә була, ә хуҗабикә мәктәптән кайтып кына кергән була. Көчле җил аркасында ялкын бик тиз тарала.
Имезүче сыер, бозау, бройлерлар — барысы да янып бетә. Хуҗабикә документларын да алып өлгермичә урамга чыгып котыла.
Берничә минут эчендә ут күршеләр — Ләлә һәм Фәрхәт Ярмөхәммәтовлар хуҗалыгына күчә. Сарайлар, мунча, гараж, йорт һәм техника көлгә әйләнә. Кышка әзерләп куелган терлекләр дә ут эчендә кала.
— Без бу йортны дүрт казык белән буш җирдән күтәрдек. Гомер буе җыйган байлык бер мизгелдә юк булды, — ди Фәрхәт Ярмөхәммәтов.
Янгын вакытында иң мөһиме кешеләргә зыян килмәгән.
Ут белән сак булыгыз!
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia