Кәүсәрия Фәтхуллина һәрвакыт ярдәмгә мохтаҗ булучылар янында

Күки авылы халкы өчен күп еллар инде тәҗрибәле, шәфкатьле һәм үз эшенә намуслы фельдшер Кәүсәрия Фәтхуллинаны һәрбер йортта беләләр һәм хөрмәт итәләр. Ул үзенең һөнәри юлын Алабуга медицина көллиятен тәмамлау белән туган авылына кайтып башлаган.
 -  Фельдшер булырга карар кылу үзеннән-үзе килде, - дип искә ала ул. - Әнием еш авырта иде, һәм мин шул чакта укыячакмын һәм кешеләргә ярдәм итәчәкмен дип, үземә сүз бирдем. Якыннарым турында кайгырту гына түгел, ә медицина ярдәме кирәк булган һәркемгә файда китерәсем килде. 
Ул бу вәгъдәсенә инде күп еллар тугры кала. Шушы вакыт эчендә Кәүсәрия ханым авылдашларының ышанычын һәм хөрмәтен генә яулап калмады, ныклы гаилә дә корды. Тормыш иптәше Рафиль белән бергә алар өч бала тәрбияләп үстерделәр, алар инде үзләре дә әти-әни булдылар. Эш-мәшәкатьләренә карамастан, балалары һәм оныклары еш кына әти-әниләренең йортына кайта, анда аларны һәрвакыт җылы һәм кайгырту каршы ала. Күки авылы халкы аны «безнең авыл докторы» дип йөртәләр. Һәм моның гаҗәбе дә юк - сәламәтлек белән бәйле теләсә нинди сораулар белән нәкъ менә аңа мөрәҗәгать итәләр бит. Район хастаханәсеннән табиблар авылга график буенча айга бер тапкыр килә. Калган вакытта авыруларга медицина ярдәмен Кәүсәрия Фәтхуллина һәм шәфкать туташы Айзәрә Гатауллина күрсәтә. Алар пациентларны кабул итә, беренче ярдәм күрсәтә, хроник авыруларны күзәтеп тора, диспансеризация һәм вакцинация үтүне контрольдә тота. Авылдашларның әйтүенә караганда, Кәүсәрия апаның йомшак сүзе һәм ярдәме кайчакта дарудан да ныграк сихәтли. Авыл фельдшерының эше ялларны да, бәйрәмнәрне дә белми. Көндезме-төнме, яңгырда, карда яисә зәмһәрир суыкта ул ярдәмгә мохтаж һәркемгә килергә әзер. Аның өчен бу - гап-гади һөнәр түгел, ә чын мәгънәсендә эшеңне яратып башкарудыр. Үзенең пациентларын ул һәрвакыт елмаеп каршы ала, тынычландыра, дәрт өсти һәм ышаныч уята. Шуңа күрә авыл халкы аны аеруча кадерли. Бүген исә эшләү күпкә уңайлырак. «Демография» милли проекты гамәлгә ашырылу нәтиҗәсендә фельдшер-акушерлык пункты тулысынча үзгәрде. 
- Авыл медицинасына ярдәм иткән өчен республика җитәкчелегенә зур рәхмәт әйтәсе килә, - ди Кәүсәрия ханым. - Элек без иске бинада эшләдек: мич яга идек, суны коедан ташый идек. Хәзер бездә җылы, су үткәрелгән, якты кабинетлар һәм эш өчен барлык кирәкле шартлар бар. Бу бөтенләй башка дәрәҗә. 
- Бүген ФАП авылда яшәүче 334 кешегә хезмәт күрсәтә. Ашыгыч очракларда район үзәгеннән ашыгыч ярдәм бригадасын да чакырып була. Ә инде пациентны кичекмәстән хастаханәгә илтергә кирәк булса, ярдәмне авыл җирлеге башлыгы Альберт Бәдретдинов күрсәтә - ул авылдашларының проблемаларына битараф калмый. - Без Альберт Бәдретдиновка ярдәме өчен бик рәхмәтле, - ди Кәүсәрия Фәтхуллина. - Ул һәрвакыт безнең эш белән кызыксына, килеп туган сорауларны хәл итүдә булыша һәм ярдәм кирәк булганда беркайчан да каршы килми. Кәүсәрия Фәтхуллина кебек кешеләр - авыл сәламәтлек саклау системасының чын горурлыгы. Аларның фидакарь хезмәте күз уңында тотылмаса да, нәкъ менә шундый белгечләр аркасында авыл халкы үзен ышанычлы итеп тоя һәм һәрчак ярдәм кулы сузардай кеше барлыгына ышана. 

Гөлчәчәк Газизова.