Балык Бистәсендә «Татарстанда җәй» проекты дәвам итә

Чара балаларны һәм аларның әти-әниләрен берләштерде, алар яраткан китаплар дөньясына мавыктыргыч сәяхәткә юнәлделәр. Паркның уңайлы почмагында, ачык һавада, балалар һәм олылар өчен күңелле һәм файдалы бәйрәм узды.

Пикник программасы кызыклы һәм хәрәкәтле чараларга бай булды. Яшь катнашучылар китаплар һәм маҗаралар дөньясына чумдылар. Алар бергәләп балалар язучыларының иң мавыктыргыч һәм кызыклы әсәрләрен укыдылар, яраткан әкиятләрне һәм хикәяләрне рәхәтләнеп тыңладылар. Аеруча дәртле итеп «Геройны таны», «Юлны дәвам ит» кебек күңелле конкурслар, шулай ук танылган әкиятләр мотивлары буенча хәрәкәтле уеннар узды. Балалар бик теләп спорт ярышларында - капчык киеп, кашыкка йомырка куеп йөгерүдә, аркан тартышу кебек уеннарда катнаштылар, тапкырлык, җитезлек һәм команда рухын күрсәттеләр.

Табигать, хайваннар һәм яраткан китап геройлары турында табышмаклар чишүдә дә балалар зур кызыксыну белән катнаштылар. «Иҗат аланлыгы»нда яшь рәссамнар ишеткән хикәяләргә якты иллюстрацияләр ясадылар, үз фантазияләрен кәгазьдә гәүдәләндерделәр. Чара дустанә һәм ирекле атмосферада узды. Кунаклар өчен «китап кәрзине» эшләде - төрле яшьтәге кешеләр өчен якты, төсле басмалар тупланмасы, һәркем күңеленә яткан китапны таба алды. «Татарстанда җәй» проекты Татарстан Республикасы Рәисе ярдәме белән гамәлгә ашырыла, ул республика территориясендә бик күп чараларны берләштерә.

Рәзилә Мөхәммәтрәхимова.