Балык Бистәсендә «Бистә шәле» II нче республика хатын-кыз һөнәрчелеге фестивале үткәрелә

Кунакларны театральләштерелгән тамаша белән бию коллективлары каршы алачак. Авыл стилендәге фотозона, музей зонасы булачак. «Иң креатив шәл» конкурсында теләгән һәркем катнаша ала. Шулай ук «Иң тиз бәйләүче», «Кәтүкне тиз әйләндерү» конкурслары узачак,  «Шәл бәйлисем килә», «Рәсемнәрдә шәл бизәге» буенча мастер-класслар үткәрелә.
Мәдәният бүлеге хезмәткәрләре әзер продукцияне тәкъдим итәчәк һәм «Бистә кабартмасы» татар милли ризыгы әзерләү буенча мастер-класс күрсәтәчәк. «Осталар бистәсе» хатын-кызлар командасы кулдан әзер продукция тәкъдим итәчәк.
Мәйданда районда гамәлдә булган дүрт проект эшләр дип көтелә.
1. «Капка төбендә» проекты. Татар утары мәйданында район фольклор коллективларының зур командасы җыелачак. Халыкны уеннарга, җырларга җәлеп итәчәкләр һәм үзләре үк халыкны иҗади номерлар белән сөендерәчәкләр.
2. Рус утарында «Эх, гармуннар уйный белсәм...» проекты командасы – оста гармунчылар һәм районның фольклор коллективлары кунаклар игътибарына милли җырлар, уеннар тәкъдим итәчәк.
3. «СПАС» проектында керәшен утары тәкъдим ителәчәк. Август бал, алма һәм чикләвек спасы белән дан тотканга, тематик фотозона һәм мастер-класслар булачак.
4. «Җәйге алан» проектында баланы вакытлыча калдырып торырга мөмкин булачак, ул халык уеннарын танып беләчәк һәм аларда катнашачак.
Төп сәхнәдә театральләштерелгән пролог күрсәтеләчәк, аның сюжетында шәлнең тарихы, кичләрен шәл бәйләү һәм яшь кызларны бу һөнәргә өйрәтү тарихы ята. Алга таба сәхнәгә үзешчән сәнгать осталары, Татарстан Республикасы кунаклары чыгачак.
Фестивальнең хэдлайнеры – «Зәкәрия» фолк төркеме. Фестиваль азагында мәйдан үзәгенә 3D форматтагы шәл чыгарылачак. Шул рәвешле, нечкә җептән 3D форматындагы шәлне ничек бәйләргә икәнен күрсәтәчәкләр.