Сәламәтлекме, әллә үзеңне “текә” күрсәтү мөһимрәкме?

Югыйсә, барысы "кызык өчен"нән генә, "текә күренергә" тырышудан башланып китә. Соңыннан наркотиклар белән бәйле булуларына төшенәләр. Әмма инде соң була. Наркотиклар турында нәрсә уйлаулары хакында берничә респондентымнан сораштырдым. Җавапларын бергәләп укып карыйк.

-Наркотикларга тискәре карашта. Аны татып караучылар яшәргә омтылуның чиген атлап чыгалар, дип уйлыйм. Алар үз куллары белән үзләрендә яшәү көчен бетерәләр. Моның белән бернәрсә дә исбат итеп булмый.

-Барлык гадәти кеше кебек үк тискәре карыйм. Наркотик-усал көч, әкрен генә кешене юкка чыгара. Аны татып караган яшүсмер, аннан бик авырлык белән генә котыла алырга мөмкин. Ул кешене үзенә бәйле итә. Аны кулланучы үзенә "кайф" алам, дип уйлый. Шул "кайф" аны үтерә дә инде.

-Әлбәттә, безнең районда да наркомания бар, авыл җирлекләрендә, район үзәгендә дә. 90 елларда ук аңа бәйле кешеләр бар иде. Күбесе үлде. Узган еллардан калган җиде кеше наркологик исәптә. Алар инде исәптән төшәргә торалар. Профилактик исәптә торучы 16 кеше вакыты-вакыты белән аны куллана. Аларның кайберләре тәртип саклаучылар тарафыннан тотылган, икенчеләре хастаханәдә медосмотр узганда беленгән кешеләр. Кулланучыларның күбесе марихуан тарталар. Мәк кайнатмасы кулланганнары да бар. Районда барлыгы 23 наркоман барлыгы беленде. Ләкин тәртип саклаучылар, медицина белгечләре күреп бетермәгәннәре дә бик күптер, бәлки. Наркотик матдәләрне законсыз кулланган кешеләрне эзләү планлы рәвештә алып барыла. Наркология комиссиясе әгъзалары конференцияләр үткәрәләр. Биредә РОВД, балалар иҗат үзәгеннән җаваплы кешеләр, мәктәп директорлары, җирле үзидарә җитәкчеләре, башка оешма вәкилләре катнашалар. Кулланучылар кимер дип ышанасы килә, хәзер бит яшьләр белемле, күп информациягә ия. "Информациягә ия булучы, бөтен дөньяга хуҗа", диләр. Элегрәк наркоманнар әлеге матдәләрнең зарары турында хәбәрдар булсалар үлемнәр дә азрак булыр иде. Алар "кайф" алу турында гына беләләр иде. Бернәрсә дә эзсез үтми, ул киләчәк буында чагылачак. Наркотик матдәләр кулланганчы, башта уйлагыз.

-Районыбызда яшьләрне кызыксындыру өчен яңа спорт объектлары төзелә, спорт секцияләре оештырыла. Яшьләр начар гадәтләргә-наркотикларга тартылмаслар, дип уйлыйм. Һәр ярышны без, наркотикларның безнең тормыштагы зарары турында әйтеп башлыйбыз. Һәр кеше үз-үзенә хуҗа. Без чын спортчылар тәрбиялибез, алар яман гадәтләрдән ерак торалар.

-Кеше өчен иң кыйммәтлесе- сәламәтлек. Иминлек, гомер озынлыгы шуңа бәйле. Очрашкач та бер-беребездән сәламәтме, дип сорыйбыз, сәламәтлек телибез. Монда зур мәгънә салынган. Яшәү үзең өчен, әйләнә-тирәдәгеләр өчен файдалы, әгәр аны дөрес итеп яши белсәң. Сәламәтлек кешенең бәхете өчен иң кирәкле шарт. Без яшь чакта наркомония сүзе булмады. Егетләрне спорт, карьера кызыксындыра иде. Наркотиклар таралуы, яшүсмерләр тарафыннан кулланылуы елдан-ел куркынычрак була бара.

Без-шәхес. Һәркем үзе өчен җаваплы. Кайсы дөньяны сайлау үзебезгә бәйле. Без киләчәкне үзебез сайлыйбыз. Дөрес вә сәламәт юлдан атласак иде.

Алия Хәбибуллина.