“Яшьлек”тә спорт бәйрәме

Бу кояшлы, аяз көнне стадионга җитәкчеләр, балалар-яшүсмерләр спорт мәктәбе, балаларны сәламәтләндерү, белем бирү үзәге тренер-укытучылары, "Дельфин" спорт комплексы хезмәткәрләре, физкультура укытучылары, спортчылар һәм гомумән спорт сөючеләр җыелган иде. Аларның күбесе өчен спорт тормышларының аерылгысыз өлеше. Араларында спортта зур уңышларга ирешкәннәре, җиңүләре алда булганнары да бар. Район данын яклап республика, Россия, дөнья күләмендәге ярышларда уңышлы чыгыш ясаучылар тәрбияләгән тренер-укытучылар белән дә горурлана алабыз.

Аларны һөнәри бәйрәмнәре белән район башлыгы Илһам Валеев котлады. Ул халыкны физкультура, спорт белән шөгыльләнүгә активрак тартырга, яңа спорт җиңүләренә өндәде. Районда моның өчен барлык шартлар тудырылуы, яңада-яңа спорт корылмалары төзелеүен билгеләп үтте.

Бүләкләүләр һәр тантананың иң күңелле өлеше. Бу көнне балалар-яшүсмерләр спорт мәктәбе директоры урынбасары Гөлнара Вәлиәхмәтова Татарстан Республикасы Яшьләр эше, спорт һәм туризм министрлыгының Почет Грамотасы, дистәдән артык тренер,укытучылар район башлыгының Рәхмәт хаты белән бүләкләнделәр.

Котлау сүзе белән район яшьләр сәясәте, спорт һәм туризм бүлеге начальнигы Мансур Мәннанов та чыгыш ясады.

"Яшьлек" стадионы республикабыздагы иң яхшы спорт корылмаларыннан санала. Биредә футбол, җиңел атлетика буенча республика ярышлары да еш үткәрелә. Күптән түгел икенче лига футбол командалары арасында Татарстан Республикасы беренчелеге узды. Анда безнең команда икенче урынны алды. Ә бу көнне Анатыш һәм Котлы Бөкәш авыл җирлекләре командалары көч сынашты. Тренерлар, физкультура укытучылары исә бәйрәмне "Спортлы Татарстан", "Президент белән бергә" акцияләре кысаларында "Хезмәткә һәм оборонага әзер бул!" нормаларын үтәү белән билгеләп үттеләр.

Наталья Хәмидуллина.

Район яшьләр сәясәте, спорт һәм туризм бүлеге начальнигы урынбасары.

Автор фотосы.