"Рубин" белән "Локомотив" уйнаганда "Казан-Арена" янында машина куеп булмаячак

"Рубин" җанатарлары бүген Казан командасы "Локомотив" белән уйнаганда үз автомобильләрен "Казан-Арена" стадионы парковкасына куя алмаячак. Дәүләт автоинспекторлары алдан чарасын күрергә киңәш итә, машиналарны ярамаган җирдә калдырмаска өнди, югыйсә, аларны штраф тукталышларына алып китәчәкләр, дип хәбәр итә Россиянең Татарстан буенча Эчке эшләр министрлыгы матбугат хезмәте.

Машиналарны, әйтик, "Леруа Мерлен" Сәүдә үзәге, "Татнефть-Арена", Су спорт төрләре сарае янында калдырырга ярый. Шулай ук җанатарларга җәмәгать транспортыннан файдаланса уңайлырак булачак.

Бүген кич 19.30 сәгатьтә булачак уен вакытында җәмәгать тәртибен 400дән артык полицейский һәм шәхси сак оешмаларыннан 430 ләп хезмәткәр саклаячак.

Чыганак: tatar-inform

Фото: news.sportbox.ru