Социаль мәсьәләләр
Күп балалы гаилә нинди ташлама белән файдалана ала
"Күп балалы гаиләләр нинди ташламалардан файдалана алалар? З. Шакирова".
Газета укучыбызның бу соравына социаль яклау бүлеге начальнигы Айгөл Вафина җавап бирә:
" Татарстан Республикасында халыкны адреслы социаль яклау турында"гы Закон нигезендә 18 яшькә кадәр өч һәм аннан да күбрәк балалары булган гаиләләргә социаль яклау бүлеге линиясе буенча түбәндәге социаль ярдәм чаралары каралган:
- 6 яшькә кадәр балага дарулар алу өчен аена 106 сум күләмендә субсидия;
- торак мәйданының социаль нормалары һәм барлык гаиләгә билгеләнгән куллану чикләрендә торак һәм коммуналь хезмәтләр, торак өчен түләү чыгымнарының 30 проценты күләмендә субсидия-ташлама;
- 18 яшькә кадәр гомум белем, һөнәри белем бирү оешмаларында укучыларга транспортта йөрү өчен ай саен 241 сум күләмендә субсидия;
Болардан тыш, уртача бер кешегә керемнәре Татарстан Республикасында билгеләнгән яшәү ихтыяҗы минимумыннан кимрәк гаиләләргә түбәндәге ярдәм бирелә:
- 16 яшкә кадәр балаларга (гомум белем бирү оешмаларында укучыларга- укып бетергәнче, әмма 18 яше тулганчы) ай саен 262 сум, ялгыз аналарга 696 сум пособие.
Шулай ук балаларның сәламәтлеген ныгыту өчен лагерларга, санаторияләргә, санатория-профилакторияләргә юлламалар бирелә.
Бу сорауны Пенсия фондының район идарәсе начальнигы Минзия Валеевага да юллаган идек. Аннан түбәндәге җавап алдык:
"Гамәлдәге пенсия закончалылыгы буенча 5 һәм аннан да күбрәк бала табып аларны 8 яшькә кадәр тәрбияләгән аналар 15 елдан ким булмаган хезмәт стаҗы булган очракта 50 яшьтән пенсиягә чыгалар".
Следите за самым важным и интересным в Telegram-каналеТатмедиа
Нет комментариев