Алсу Әбелханова туйга әзерләнә [ФОТО]

Аптырашта калмагыз: Алсу Әбелханова белән аның тормыш юлдашы Радикның бергә гаилә корып яшәүләренә 24 сентябрьдә 10 ел тула. Менә шушы вакыйгага әзерләнүләре икән. Бүгенге көндә алар 3 нче сыйныфта укучы уллары Әмир белән 2 яшьлек уллары Солтанны үстерә. Радик үзе Самара шәһәрендә эшләгәнгә, гаиләгә ике шәһәрдә - Казан белән Самарада яшәргә туры килә.

Җырчы 10 ел элек булып узган кызыл туйларын яратып искә ала. Аның бер сулышта узганын хәтерли. Әле бер ел гына үткән кебек, ди. Туйда иң истә калганы шул булган: туй мәҗлесе ахырында Алсу Әбелханова сәхнәдә җыр башкарган, ә Радик бии-бии аның аякларына барлык чәчәкләрне салып, килгән кунакларны шаккатырган. Радик - иҗат кешесе булмаса да, җырчының зур терәге. Бик җаваплы, гаилә җанлы, балаларын үлеп яратканын әйтеп узды.

- Зур булмаган компания белән гәрәбә туебызны билгеләп узу иде исәп. Лимузинга утырып, шәһәр буенча йөреп, соңыннан төнге клубларның берсенә барырга ниятлибез. Шулай ук балалардан башка гына Гарәп Әмирлекләренә барып, ял итеп, вакыйганы билгеләп кайтырга уйлыйбыз. Радикның мине аңлаучы, бик тә гаилә җанлы булуына Аллаһы Тәгаләгә чиксез рәхмәтлемен. Ул үзе бик күңелле кеше. Бер ягы гына бар: бөтен сүзне көлкегә борып җибәрә. Хәтта мин бик нык ачуланганда да, ул аны көлкегә бора да җибәрә. Көлдергәч, минем тагын да ачуым килә башлый, - ди җырчы.

Иҗатына килгәндә, Алсу Әбелханова соңгы вакытта тамашачылардан башка гына сольный концертының телевизион версиясен төшерткән. Концерт Казанның бер концертлар залында 6 камерага һәм махсус режиссер ярдәмендә төшерелгән. Сольный концертка ул бер ел әзерләнгән. Әлеге программага 12 җыр кергән. Шулай ук популяр булган "Сорама хәлләремне" исемле җыры да бар. Һәрбер җырга аерым номер эшләнелгән. Сәхнә куелышы, шулай ук шоу-балет ярдәмгә килгән. Тиздән тамашачы телевизор экраннардан да күрер дип көтелә.

Гәрәбә туйларына Радикның җырчыга нәрсә бүләк итәсе билгеле түгел. Алсу Әбелханованың "Пар алкалар" җырындагыча пар алкамы, әллә башкасымы?..

(intertat.ru. яңалыклары)