Бүген балыкбистәлеләр үзләренең киләчәген сайлыйлар (фотолар)

Полянка авылында бүгенге көнгә тавыш бирергә хокукы булган 649 кеше теркәлгән. Тавыш бирергә беренчеләрдән булып Балык бистәсе 2 нче мәктәбе директорының хуҗалык эшләре буенча урынбасары Сәүбан Шәрәфиев килде.

- Татарстаныбызның, балаларыбызның, оныкларыбызның киләчәге якты булсын өчен тавыш бирәм,- диде ул, бюллетеньнәрен ящикка төшергәндә.

Район хакимияте башлыгы Илһам Валеев сайлау участогына тормыш иптәше Рәмзия ханым, уллары, килене, оныгы белән бергәләп килде.

- Соңгы елларда республикабызда халыкның тормыш дәрәҗәсен күтәрү юнәлешендә колачлы эшләр башкарыла. Районыбызда да федераль, республика программалары нигезендә социаль объектлар төзелә, яңартыла. Шушы Полянка авылында да күптән түгел заманча фелдьшерлык- акушерлык пункты ачтык. Боларны халык белеп , күреп тора. Киләчәктә дә мондый сәясәт дәвам итсен өчен Дәүләт Думасына лаеклы депутатлар, көчле Татарстан командасын сайларга кирәк,- диде ул.

Авылның иң өлкән сайлаучысы, Бөек Ватан сугышы ветераны, 93 яшен тутырган Мәгъмүрә апа Әхмәтова дөньяларга тынычлык,булачак депутатларга аек акыл, зирәклек теләп тавыш бирде.

- Безнең авыл халкы элек-электән сайлауларда активлык күрсәтә. Быел аеруча актив катнашалар. Менә сәгать 12 дә тулмаган әле, ә сайлаучыларыбызның 75 проценты тавыш бирделәр инде, - диде Полянка участок сайлау комиссиясе рәисе Фирая Ситдыйкова.

Илгиз Җамалиев.

Автор фотолары.