“Радуга” балалар бакчасында Сабантуй үткәргәннәр (ФОТО)

-Сабантуйда нишлиләр балалар, дип сорады татар теле тәрбиячесе Иделия Мәхмүтова. "Ат чабышы була, көрәшәләр, уеннар уйныйлар",- диеште балалар. Иделия апалары бәйрәмнең үткәрелү тәртибен аңлатты аларга. Аннан җыелып сөлге җыярга киттеләр. Чиккән кулъяулык, яулыклар, сөлгеләр бүләк итте тәрбиячеләре. Марсел Җәләлов көрәшкә язылу вакыты җиткәнен хәбәр итте, егетләргә көрәшү тәртибен аңлатты. Кечкенә көрәшчеләр бик батыр булып чыкты, җиңелүчеләр булмады. Аннан бәйрәм чүлмәк вату, көянтә белән су ташу, капчык киеп йөгерү кебек уеннар, бию ярышлары белән дәвам итте. Балаларның берсе дә сынатырга теләми, бик теләп катнаштылар. Мин сораша башлагач һәрберсе үз уй-кичерешләре белән уртаклашырга ашыктылар.

-Мин сабантуй бәйрәмен бик яратам. Капчык киеп тә йөгердем, биедем дә. Күгәрченгә Сабантуйга барабыз әле. Анда шигырь сөйлим,-ди Илүзә Шириязданова. "Ә мин көрәштем, капчык киеп йөгергәндә беренче булып килдем. Район Сабантуенда уеннарда катнашам",- дип сүзгә кушылды Альмир Йосыпов.

Бу язманы тулырак газетадан укый аласыз.

Гөлназ Зарипова.

Автор фотолары.