Балык бистәсендә “Ел укытучысы-2015” конкурсының финал өлеше узды (ФОТО)

Конкурсның икенче турында педагоглар гимназия укучыларына ачык дәрес күрсәттеләр, тәҗрибә уртаклаштылар. Иң көчле җиде укытучы өченче турга дәгъва белдерде. "Һәр укытучы да үзенчәлекле, һәркайсының асыл өлешен алырга була. Әмма конкурс булгач, конкурс инде. Шулар арасыннан иң көчле педагогларны сайлап алырга туры килә",-ди мәгариф бүлеге җитәкчесенең укыту-методик эшләре буенча урынбасары Резидә Җәләлова.

Иртәдән балалар иҗат үзәгендә конкурсның өченче этабына көч сынашырга җыелдылар. Бүген финалистлар мастер-класслар күрсәтә. Ул дәрес түгел, үз фәне буенча куллана торган укыту формасын, ысулларын тәкъдим итү. Һәр укытучы үз фәненә карата баланы кызыксындыру чараларын уйлап табып, нинди нәтиҗәгә ирешә алуын җиткерде. Укытучы-педагог, артист, психолог, музыкант та. Бәйге барышында моңа тагы бер инанырга туры килде. Иң көчлеләр арасыннан тагын көчлерәкне аерып алу, әлбәттә, җиңел булмады.

"Ел укытучысы-2015" исеменә икенче мәктәпнең татар теле һәм әдәбият укытучысы Эльвира Токранова лаек булды.

Урахча мәктәбе рус теле укытучысы Жанна Мостафина һәм Ямаш мәктәбе инглиз теле укытучысы Халидин Әхәтовлар призерлар булды.

Иң яхшы физика укытучысы булып Олы Мәшләктән Венера Окрикова.

Иң яхшы математика укытучысы булып Олы Елга мәктәбеннән Рушания Сибгатуллина билгеләнде.

Җиңүчеләр дипломнар белән бүләкләнделәр. Алар зона буенча республика ярышларында катнашачаклар.

Гөлназ Зарипова.

Бу язманы газетабыздан укый аласыз.

Фото авторныкы.