Наталья Хәбибуллина - намуслы хезмәткәр һәм кайгыртучан ана

2013 елда, өченче баласы белән декрет ялыннан чыккач, Наталья район почта элемтәсе участогына эшкә урнаша. Яңа һөнәр башта таныш түгел кебек тоелса да, ул аны тиз үзләштерә.
-Хәтерлим, миңа газеталар салынган сумканы бирделәр һәм мин шул көнне үк таратырга киттем. Әбунәчеләрнең йорт адресларын тиз таптым. Бу  эш миңа ошый. Ике участокта да яхшы кешеләр яши. Элек газета-журналларны күп алдыралар иде, икешәр сумка ташый идек, ә хәзер күпкә азрак, бер сумка белән генә йөрибез. Тик квитанцияләр таратканда барыбер арыта, - дип сөйли хезмәте турында Наталья.
Хезмәттәшләре билгеләп үткәнчә, ул һәрвакыт үз вазифаларына җаваплы карый һәм барысын да вакытында башкара. Ә бу - почтальон эшендә иң мөһиме.
Натальяның эш көне хатларны һәм корреспонденцияне тикшерүдән башлана. Ул барысын да таратырга әзерләп пөхтә итеп урнаштыра. Һәр атна саен хат ташучылар газета-журналларны тикшерү өчен чиратлашып кизү торалар-шулай итеп участокның өзлексез эшләве тәэмин ителә.
Почтальон эше бик катлаулы хезмәт, ул шактый сабырлык һәм рухи көч таләп итә. Билгеләнгән участоктагы урамнар ераклыгын исәпкә алсак та җиңел түгел. Моннан тыш теләсә нинди һава торышында - яңгырда, кар-буранда, эсседә, салкында да эшләргә туры килә аңа. 
Авыл почтальоны мөһим социаль роль уйный: ул хатлар һәм посылкалар китереп кенә калмый, ул кешеләр өчен кайгыртучан әңгәмәдәш һәм игътибарлы ярдәмче. Мондый белгечләрнең бурычларына вакытлы матбугат һәм пенсияләр китерү; үзләренә ошаган басмаларга язылу; коммуналь хезмәтләр өчен түләүләр җыю; кирәкле товарлар китерү дә керә.
Шәхси тормышы турында сүз чыккач, Наталья үзенең дустанә мөнәсәбәтле гаиләдә үскәнен сөйләде: әнисе бухгалтер, ә әтисе шофер булып эшләгән. Олы кыз, энесенең сеңлесе буларак, ул кечкенәдән үк җаваплылыкка өйрәнә. Тугызынчы сыйныфтан соң Наталья райондагы һөнәри техникумына укырга керә һәм «утар хуҗабикәсе» һөнәрен үзләштерә.
Наталья язмышын Балык Бистәсе егете Рафис белән бәйли. Инде 28 ел алар тормышта кулга-кул тотынышып баралар. Аларның гаиләсендә дүрт бала -дүрт шатлык, горурлык чыганагы булып үсә.
Олы кызлары Алия массакүләм мәгълүмат чаралары өлкәсендә үз һөнәрен тапкан һәм хәзер гаиләсе белән күрше Лаеш районында яши. Лилия - элемтә техникумының дүртенче курсында белем ала, Марат - гимназиянең сигезенче сыйныфында укый, ә иң кечесе, ике яшьлек Русланчик, балалар бакчасына йөри. Баланы тәрбияләүдә әти-әнисе зур ярдәм күрсәтә. Балаларны да ул намуслылыкка, хезмәт сөючәнлеккә, үзе ия булган сыйфатларга өйрәтә. 
Ә гаиләдә балалар күп булганда, шатлык икеләтә арта. Наталья ана булуны — хатын-кыз өчен иң зур бәхет, дип саный. 
Наталья Хәбибуллина кебек игелекле кешеләр булганда дөнья тагын да матуррак, көндәлек тормыш тагын да уңайлырак булып күренә. Барлык хат ташучыларга да хезмәтегез өчен рәхмәт диясе килә.