Евдокия Толстованың милли гореф-гадәтләрне саклауда керткән өлеше

Ул район һәм республика дәрәҗәсендәге чараларда актив катнаша һәм уңышлы чыгыш ясый. Бу аның һөнәргә тугрылыгын, туган җиргә һәм аның кешеләренә булган мәхәббәтен күрсәтә. Евдокия Григорьевна шулай ук керәшен мәдәниятен саклаучы да.
«Мин үз эшемне яратып, халыкның күңелен аңлап эшләргә тырышам. Гомеремнең бер генә минуты да мәдәният тормышыннан башка узмый торгандыр. Мин кешеләр уңышына сөенәм, авыр вакытларда аларга ничек ярдәм итәргә икәнлеге турында да уйлыйм. Шулар белән бергә вакытның ничек узганын да сизмим», - ди ул.
Иванай - аның туган авылы, ул шунда беренче адымнарын ясый. Ә аның тормыш юлы Бирдебәк авылы белән бәйле. Мәдәнияттә эшләү аша ул кешеләргә тормышның матурлыгын һәм байлыгын күрсәтергә омтыла.
Евдокия кайгыртучанлык һәм мәхәббәт хөкем сөргән күп балалы гаиләдә туа. Ул - гаиләдә дүртенче бала. Әтисе Григорий тракторчы булып эшләгән, әнисе Анна төрле эшләрдә хезмәт куйган. Алар хезмәт сөючән һәм укымышлы булганнар. Евдокия балачактан ук эшкә күнегеп үскән. Җиде яшеннән ул сеңлесенә сыерларны кулдан саварга булыша. Җиләк, чикләвек һәм гөмбә җыярга барулары да күңелендә матур истәлек булып калган. Башлангыч белемне ул - Иванайда, сигезьеллыкны Каз. Чаллыда ала. Мәктәп директоры Рамил Шамил улы Гатауллин, физика һәм математика укытучысы Николай Григорьевич Максимов аңа Арча педагогия училищесына укырга керергә киңәш итәләр.
Евдокия аларның киңәшен тота һәм укырга керә. Дүрт ел уку дәверендә ул җиңел атлетика белән шөгыльләнә һәм еш кына беренче урыннарны ала. Биредә ул бәйләргә, чигәргә, сувенирлар ясарга һәм бәйрәмнәр оештырырга өйрәнә. Аннары читтән торып Казан дәүләт педагогика университетында укуын дәвам итә, башлангыч сыйныфлар укытучысы һәм тәрбиячесе дипломын ала һәм район мәгариф бүлегенә эшкә килә. Ул вакыттагы җитәкче Рашат Хәбибуллин аны туган мәктәбенә татар теле укытучысы булып эшкә җибәрә.
Евдокия укыта башлый һәм өлкән пионервожатый булып эшли. Бирдебәк авылында мәктәп ачылгач, аны шунда җибәрәләр. Балалар саны кимү аркасында мәктәп ябылгач, ул эшсез кала. Шул чагында аңа хезмәттәше Анатолий Николаевич Дмитриев клубта эш тәкъдим итә.
Мәдәният өлкәсен беренче көннән үк үз итә ул. Балалар өчен фольклор коллективлары, өлкәннәр өчен җыр яратучылар клубы һәм яшьләр өчен театр берләшмәләре оештыра. Алар даими рәвештә район, республика һәм төбәкара фестивальләрдә катнашалар. Авылда һәр бәйрәмне үзенчәлекле, матур итеп уздыралар.
Мәдәни мирасны саклап калу максатыннан ул музей ача, анда авыл халкының кием-салымы, кораллары һәм көнкүреш әйберләреннән экспонатлар туплый. Бу аның авыл халкына булган ихтирамын һәм мәхәббәтен күрсәтә. Иренми, төрле чаралар үткәрә. Аның җитәкчелегендәге «Айбагыр» фольклор ансамбле республика керәшен бәйрәмнәрендә призлы урыннар яулый.
Шәхси тормышында да бәхетле ул. Ире Николай белән балалары өчен сөенеп яшиләр.
2025 елда ул авыл җирлекләрендә муниципаль мәдәният учреждениеләренең иң яхшы хезмәткәре исемен алды һәм «Гаилә тарихында гасырлар кайтавазы» республика шәҗәрә фестиваленең муниципаль этабында беренче урынны яулады. Аның авылдашлары белән бергә махсус хәрби операция зонасындагы сугышчыларыбызга ярдәм күрсәтү буенча алып барган эшчәнлеге дә игътибарга лаек.
Евдокия Григорьевнага юбилеен билгеләп үткән көннәрдә һәрвакыт шундый актив, шат күңелле булып калуын, авылдашларын, якташларын яңа казанышлары белән сөендерүен телибез.