Әтисе хезмәтен үзенә гомерлеккә мирас итеп алган

Хуҗалыкта язгы кыр эшләреннән соң бераз ял биргәнлектән, Гремячка авылының алыштыргысыз, иңендә кырык еллык хезмәт тәҗрибәсе булган  механизаторы Илсур Әмиров белән өендә очраштык.  Ул авыл хуҗалыгы хезмәте  белән бик кечкенәдән таныш. Әтисе хуҗалыкта гына түгел, район күләмендә озак еллар дәвамында беренчелекне бирмәгән Зиннур абый, аны  унике яшеннән үзе янына комбайнчы ярдәмчесе итеп алып, игенче хезмәте серләренә өйрәтә башлаган. Мәктәптә 8 нче сыйныфтан соң районның һөнәри уку йортын тәмамлап кайткан. Белемле механизатор авылда бик кирәкле һөнәр иясе булганлыктан, ул эшен авыл җирлегендә дәвам итәргә була.  Бүген дә ул Гремячка авылының алдынгы механизаторы. Хуҗалыкта да аны хөрмәт итәләр, җитәкчелек тә аның хезмәтен югары бәяли.  Чөнки ул барысын да үзе белеп, тел-теш тидермәслек итеп, җиренә җиткереп башкарырга гадәтләнгән .   Дөресен генә әйткәндә, аның бүгенгесе көнне утырып эшләмәгән берәр техникасы бар микән? Юктыр, мөгаен, бүген халык телендә нәкъ менә шундыйлар турында, әтисе хезмәтен үзенә гомерлеккә мирас итеп алган, дип бер дә тикмәгә генә әйтмиләрдер