Зәңгәр Күл авылы фермеры Айрат Зәйнуллинның эшләре көйле бара

Үз эшен башлаганчы аның авыл хуҗалыгы буенча тәҗрибәсе булган инде. Башта күпьеллык үлән үстерү белән шөгыльләнгән. Азык һәм техник базаны ныгытканнан соң гаилә фермасы оештырырга уйлаган. Авылдашларының пай җирләре белән бергә 230 гектар җире бар аның. Авыл хуҗалыгы культураларыннан рапс, кукуруз үстерә. Узган ел силосын Алабуга районына саткан.

-2012 елда федераль программага үтеп грант оттым. Авыл хуҗалыгы Министрлыгы белән килешү нәтиҗәсендә маллар өчен бина төзедем, трактор алдым. Әтнә районынан үз акчама сөт породалы сыерлардан туган нәселле өч айлык 30 үгез алып кайттым. Аперель аенда бер ел була инде. Көндез алар кардада булалар,-дип сөйләде ул.

Үгезләр, хуҗаларын күрүгә, карда кырыена килделәр. Һәркайсының колагында номерлы биркалар. Алларында азык җитәрлек, суны утын ягып җылыталар. "Үгезләрне сатасызмы, әллә ит итәсезме?-дигән сорауга Айрат Фоатович нәсел үрчетү өчен тотарга исәпләвен әйтте. Фермада гаиләләре белән эшлиләр. Кыр эшләре вакытында төп ярдәмче - Фаяз Галимов икән. Бухгалтерия эшләрен егерме алты ел бергә яшәгән тормыш иптәше Тәгзимә алып бара. Малларны вакытында ашатып, эчертергә дә кирәк бит. Эш көнегезне сәгать ничәдә башлыйсыз?- дип сорыйм.

-Без арып-талганчы эшләмибез. Ял итәргә дә вакыт табабыз. Һәр нәрсәнең үз үлчәме булырга тиеш,-диде ул.

Зайнуллиннар тормыш тәҗрибәсеннән чыгып эшлиләр, тулы тормыш белән яшиләр.

Таңсылу Минһаҗева.