«Теләкләр чыршысы» тормышка ашырды

Бу инициатива район халкы, эшмәкәрләр һәм төрле оешма вәкилләре тарафыннан бик тиз кабул ителде.
Журналистлар халыкны социаль яклау бүлегенә мөрәҗәгать итеп ярдәм һәм игътибар кирәк  булган балалар исемлеген төзергә булышуларын сорадылар. Гаиләләр белән әңгәмә барышында редакция балаларның нинди бүләкләр алырга хыяллануларын белде. Редакциянең баш мөхәррире Гөлчәчәк Газизова җитәкчелегендәге хезмәткәрләр офиста кечкенә генә чыршы ясадылар һәм аңа теләкләр язылган открыткалар элеп куйдылар.
Шуннан соң редакция эшмәкәрләргә һәм оешма җитәкчеләренә акциягәкушылу  тәкъдиме белән чыкты. Җавап шулкадәр зур булды ки, балалар өчен бүләкләрне кыска вакыт эчендә җыеп булды.
«Авыл офыклары» балачак хыялларын тормышка ашыруда ярдәм иткән һәркемгә - шәһәр җирлеге башкарма комитеты җитәкчесе Марс Мәгыйзовка, баш табиб Илназ Әхмәдиевка, эшмәкәрләр советы рәисе Руслан Дормидонтовка, үзмәшгуль Илнар Мостафинга, Дәүләт автоинспекциясе начальнигы Илназ Шиһаповка чын күңелдән рәхмәт белдерә.
Декабрь азагында журналистлар һәм акциядә катнашучы-иганәчеләр Кыш Бабай һәм Кар Кызы белән бергә балаларга бүләкләр тапшырдылар. Тантаналы атмосфера, җылы елмаюлар һәм чын хыяллар бу көнне чын мәгънәсендә тылсымлы итте.
Балалар бүләкләргә бик шатландылар, ә ата-аналар рәхмәт сүзләрен җиткерделәр. «Балаларыбызның күзләрендә шатлык күрү - зур бәхет. Бу игелекле эштә катнашучыларның барысына да рәхмәт», - дип билгеләп үттеләр аларның күбесе.
Акция мохтаҗлар өчен Яңа елны чын бәйрәм итү өчен күпме кеше берләшергә әзер булуын күрсәтте.