Вадим Захаров: “11 декабрьгә кадәр 15 килога ябыкмасам, дус егеткә сыер боты бирәсе булачак”
Вадим Захаров 1 айга якын диета тоткан. Ни сәбәпле җырчы ябыгырга теләгән соң ? Диета тоту аңа авырдан биреләме? Бу турыда үзеннән сораштык.
Нинди диета тотасың, Вадим?
- Ипи, камыр ризыклары ашамыйм. Күбрәк җиләк-җимеш, яшелчә ашыйм. Баллы әйберләргә элек тә исем китми иде. 11 декабрьгә кадәр 15 кило ыргытырга кирәк. Нишләп бетәсе булыр... Тырышасы иде инде. Болай процесс яхшы бара кебек.
- Ничә килога ябыктың?
- Күпме ташлаганны әйтә алмыйм, чөнки үлчәнергә куркам. Ә болай ябыгу сизелә, ярамаган күлмәкләр ярый башлады.
- Ни өчен диета тотарга булдың соң?
- Үзем өчен. Кан басымы да уйный башлады. Шуның өстенә дус егет белән бәхәсләштек. Ул да 11 декабрьгә кадәр ябыгырга тиеш, мин дә.
- Нәрсәгә бәхәсләштегез?
- Сыерның бер арткы ботына.
- Уйлап та табасыз инде! Авырдыр инде сиңа диета тоту? Кибеткә кергәч, камыр ризыкларын читләтеп үтәсеңме?
- Өчпочмак, мантый, бәлешләрне күргәч, күздән яшьләр чыга. Ләкин түзәрлек. Болай булгач, була, Аллага шөкер. Ашыйсы килгәндә, ашказанын алдау өчен 1 алма ашап куям.
- Спортзалга йөрисеңме соң?
- Еш түгел, баргалыйм.
- Алла ярдәм бирсен сиңа!
Следите за самым важным и интересным в Telegram-каналеТатмедиа
Нет комментариев