Татарстанда юл кагыйдәләрен бозган өчен штрафлар арттырга мөмкин

Сүз салонда балалар булган очраклар турында бара. Бу хакта Дәүләт Советының Законлылык һәм хокук тәртибе комитеты утырышында сөйләштеләр, дип хәбәр итә «Татар-информ» МА.
Саннар ни сөйли?
Республика юлларында балалар катнашындагы аварияләр саны, кызганычка каршы, арта бара. Ел башыннан ике ай эчендә Татарстанда 40 юл-транспорт һәлакәте теркәлгән. Бу аварияләрдә бер баланың гомере өзелгән, 45 бала төрле тән җәрәхәтләре алган. Үткән ел белән чагыштырганда, юл һәлакәтләре саны да, аларда имгәнүчеләр саны да арткан.
Нинди җәзалар көтелә?
Татарстан буенча Юл хәрәкәте куркынычсызлыгы дәүләт инспекциясе идарәсе башлыгы урынбасары Айрат Сәмигуллин түбәндәге үзгәрешләрне кертергә тәкъдим итте:
Машинада бала булганда исерек килеш рульгә утыру:
* Штраф — 50 000 сумга кадәр.
* Машина йөртү хокукыннан мәхрүм итү — 2 елдан 3 елга кадәр.
Машинада бала булганда каршы полосага чыгу:
* Штраф — 15 000 сум.
* Машина йөртү хокукыннан мәхрүм итү — ярты елдан 1 елга кадәр.
– Юл инспекциясе балалар булган очракта юл кагыйдәләрен тупас бозган өчен җаваплылыкны арттырырга тәкъдим итә. Бу – балалар катнашындагы аварияләрне кисәтү чарасы, – дип билгеләп үтте Айрат Сәмигуллин.
Дәүләт Советы депутатлары бу тәкъдимне хуплады, әмма мәсьәләне Дәүләт Думасы дәрәҗәсенә чыгару өчен өстәмә мәгълүматлар тупларга кирәклеген әйттеләр. Комитет рәисе Александр Чубаров әйтүенчә, Татарстан мәгълүматларына гына түгел, башка төбәкләрнекенә дә таянырга кирәк булачак. Алга таба бу юнәлештә зур эш көтелә.