Рәфыйга Габдулгазиз кызы Ихсанова шигъри җанлы шәхес

Һәрвакыт яңалыкка омтылучан, эзләнүчән, шигъри җанлы ханымның күңел дәфтәреннән берничә юл шигырь...

***   ***   ***

Ап-ак томан

Җирне сарган.

Тын да алмый карап торам.

Каралтудан

Бигрәк куркам.

***   ***   ***

Рәшә уйнап торган

басуларга

Көләч яңгыр сыман

Явасым килә

бик тә.

... Салават күпере булып

Хыялым балкый күктә.

***   ***   ***

“Усал!”-диләр.

Юаш соң я кайсыбыз?!

...Миһербанлы җаннарга

Сусаган бер чагыбыз.

***   ***   ***

Тамчыдан күл җыела,

Белми әйтмәгән халык.

Халыкның хаклыгына

Яшим хәйраннар калып.

***   ***   ***

Офыкларның чите алсуланган,

Таң атырга әле иртәрәк.

...Караңгы төн алган кочагына

Кичә аткан таңны иркәләп.

***   ***   ***

Дөрләп янган учак яктысында

Утлы очкын, гүя синең шәүлә.

...Канатлары көйгән күбәләккә

Ачы төтен салкын кочак җәя.

***   ***   ***

Тәрәзәмдә ялт та йолт

Кояш йөри

                               яратып!

***   ***   ***

Кояш кереп тулган өйгә

Каян тапкандыр безне?

Көнозын сыйлыйм узен!

Чәй эчәбез бергәләп

Кояш белән

                        икәүләп...

***    ***   ***

                                        Оныкларыма багышлап

Дәү әтинен сәпиенә

Тезелешкән чыпчыклар.

Чырык-чырык көләләр.

Инстаграмга куярга

Селфи ясап йориләр.

***   ***   ***