Илсөя Бәдретдинова: «Түзәр чарам юк, үз хәлемне үзем генә беләм...»
Күңел халәте чагыла
Казанда композитор Зөфәр Хәйретдиновның, пандемия сәбәпле, күчерелгән юбилей концерты булды.
Илсөя Бәдретдинова бу көннәрдә бераз чирләп китсә дә, Зөфәр Хәйретдиновны котларга килмичә булдыра алмаган. Җырчы әлеге концертта бернинди әзерлексез, «шпаргалка»дан карап җырлады.
«Хәзер башкарасы җырның тарихы белән таныштырыйм әле. Бүген бу җырны җырларга тиеш түгел идем. Хәзер генә уйладык. Берсендә бик каты күңел тулганда, мин Зөфәр абыйга киңәш сорап шалтыраттым. Ул „минем дә күңелнең шундый чагы“ дип шушы җырны тәкъдим иткән иде», — дип сөйләде Татарстанның «атказанмаган» җырчысы.
«Аңлыйм димә, аңламыйсың әле,
Түз дә димә, түзәр чарам юк.
Үз хәлемне үзем генә беләм,
Онытылырга гына чарам юк», — дип җырлады ул.
Бу җырда Илсөя Бәдретдинованың күңел халәте чагыла.
«Илсөянең апасының бүген иртәгә гомере өзелергә тора. Шундый вакытта да концертка килеп, җырлаганы өчен рәхмәт», — диде Зөфәр Хәйретдинов концерт азагында.
Илсөя Бәдретдинованың бертуган апасының авыртуы турында язган идек.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia