Икмәк тәмен иккән белер...»

 Уракка төшәр сәгатьләрен көткән игенче кояш  кыздырса да, яңгырлар явып үтсә дә алардан шифа, мул уңыш өмет итте.

Район авыл хуҗалыгы һәм азык-төлек идарәсенә бу көннәрдә хуҗалыклардан сөенечле хәбәрләр килеп тора.  “Солтан”, “Шәйхетдинов”, “Григорьев” хуҗалыкларының борчак суктырулары һәм алынган уңышның күпме булуы белән кызыксынган бер минутта, “Кама-Агро”дан уракка төшүләре турында мәгълүмат та килеп иреште.

-Бүгенге көндә егетләребез арпа суктыруда эшли. Көннәр матур тора. Шуңа да һәр сәгать-минуттан нәтиҗәле файдаланырга тырышабыз, - ди “Кама-Агро” җәмгыяте  баш агрономы Газиз Ханов.

Беренчеләрдән булып уракка төшкән игенче-механизаторларның исемнәрен зур горурлык белән атый ул.

Шулай булмый ни, барысы да тәҗрибәлеләр, тырышлар, сыната торганнардан түгелләр. “Полесье-812” комбайнында Әгъзәм Сибгатуллин, Әлфәт  Шәйхетдинов, Рафис Галиуллин, Исмәгыйль Садыйков, Павел Гаврилов хезмәт куйса, Евгений Гарифуллин “Акрос-550” комбайнын иярли.

-Арпаның гектарыннан 35-36 центнер уңыш чыгар дип көтәбез. Елына күрә начар түгел. Кырда салам пресслауны да берочтан алып барабыз. Әлеге эш механизаторларыбыз Хәсән Ягъфәров белән Газинур Садриевка йөкләнгән, - ди Газиз Ханов.

“Икмәк тәмен иккән белер”, ди халык. Маңгай тирен түгеп игелгән икмәк амбарларга  кергәнче әнә шулай катлаулы юллар үтә. Ә без исә басу-кырларда аяусыз хезмәт куйган авыл хезмәтчәннәренә изге теләкләребезне  җиткерәбез: “Хәерле сәгатьтә, игенче! Матур җәйләр, икмәкле, уңышлы еллар булсын!”