Быел район гражданлык хәле актларын теркәү бүлегендә (ЗАГС) 24 пар никахларын теркәгән.

–Хәзерге яшьләр тормыш корырга бик ашыкмыйлар күрәсең. Өстәвенә соңгы елларда никахларын законлы теркәмичә генә яшәүче гаиләләр дә артты,–ди бүлек мөдире Миләүшә Зарипова.

Ә менә балалар тууның узган елга караганда артуы куанырлык. Агымдагы елның 6 аенда район гражданлык хәле актларын теркәү бүлегендә 47 бала: 29 малай һәм 18 кыз тууы теркәлгән. Алар арасыннан 14 бала гаиләдә беренче нарасый булып туса, 14 бала гаиләдә–икенче, 15 бала–өченче, 4 бала күпбалалы гаиләдә дөньяга килгән. Балаларга исә Айназ, Нургазиз, Рәзил, Ибраһим, Зәйнәп кебек матур яңгырашлы исемнәр кушылган.

фото ok.ru