Авыл хезмәтчәннәре печәнгә төште

-Соңгы вакытларда яңгырларның явуы кырларда игеннәр күтәрелүенә, печәннәр өлгерүенә шифасы булды. “Урахча”, “Кама”, “Кулон”, Балык Бистәсе азык-төлек корпорациясе” беренчеләрдән булып печәнгә төштеләр. Хәзер инде кояшлы, матур көннәрдән файдалана белергә генә кирәк, - ди район авыл хуҗалыгы һәм азык-төлек идарәсе башлыгы Марат Мингалиев.

Әйе, авыл хезмәтчәннәре өчен табигатьнең һәр фасылы үзенчәлекле. Яздан башланган хезмәт шавы көзгә кадәр - игеннәр амбарга кергәнче, терлек азыклары җитәрлек тупланганчы дәвам итә.

Урахчалыларның да печән җыюда эшләре уңышлы бара. Җитәкчеләре Рамил Мостафин хезмәт барышыннан бик канәгать.

- Күпьеллык печән 250 гектар мәйданны тәшкил итә. Шуның 150 гектарында печән җыеп алынды. Механизаторларыбыз иртәдән кичкә кадәр кырда. “МТЗ-80” тракторында эшләүче Ралиф Гарипов, Андрей Патрикеев, Габдуллаҗан Газизовның хезмәте бәяләп бетергесез. Тырышлыклары өчен барысына да чиксез рәхмәтемне җиткерәсем килә, - ди Рамил Мостафин.

Афәрин! Көннәр матур торганда авыл хезмәтчәннәре сынатмас, терлекләрне уңышлы кышлату өчен җитәрлек күләмдә терлек азыгы хәзерләнер, дип ышанасы килә.

Фәрвәз Каюмова.