Авыл офыклары

Балык Бистәсе районы

18+
Рус Тат
2024 - год Семьи
Җәмгыять

Зур максатлар уңышларга итә

 2021ел - Президентыбыз та­рафыннан Туган телләр һәм ха­лыклар бердәмлеге елы буларак билгеләп үтелә.

Шул җәһәттән үзебезнең татар мәктәбендә укып, милли тәрбия алып, тор­мыш юлында зур уңышларга ирешкән кешеләр турында ешрак сөйләсәк, бу телебез­не саклау, үстерү эшенә саллы гына өлеш булыр иде, дип уй­лыйм. Һәм шул максат белән кулыма каләм алдым да инде. Язмамның герое саф татар гаиләсендә туып-үсеп, зур тор­мыш сукмакларына аяк баскан кеше.

Рәшит Фәләхетдин улы Таҗетдинов Яңа Арыш авылын­да 1948 елның 5 гыйнварын­да гади колхозчы гаиләсендә дөньяга килә. Хәер, гади гаилә дип әйтү дөрес үк булмас: әтисе - Фәләхетдин абый - кече ко­мандир, Бөек Ватан сугы­шында взвод белән идарә итә, күрсәткән батырлыклары өчен II Дәрәҗә Ватан сугышы орде­ны белән бүләкләнгән; әнисе Фатыйма апа исә авылның данлыклы остасы булган, үз кулы белән ашлык тарту тегермәннәрен төзеп, эшләтеп торган Мөхәммәтҗан бабай кызы. Әлбәттә, бу сыйфатлар язмамның героена да күчми калмагандыр.

1963 елда Яңа Арыш сиге­зьеллык мәктәбен тәмамлаган егетне укырга кая барыр­га дигән сорау бик борчыма­гандыр да. Ул елларда авыл янәшәсендәге урманчылыкның дәрәҗәсе бик югары чагы: Нур­гали Миңнехан улы уңышлы эшчәнлегенә нигез салып кал­дырган, авыл өчен яшәү чы­ганагы белән бер булган оеш­ма бит ул! Һәм егет Кукмара районында урнашкан Лубян урман хуҗалыгы техникумы­на юл тота. 1967 елда укуын тәмамлап Совет Армиясе саф­ларына хезмәткә алына.

Армиядән кайткач, 1969 елда аның хезмәт юлы Әлмәт районының Кәләй урман хуҗалыгында урманчы бу­лып башланып китә. Ике ел эшләгәннән соң, белемен күтәрәсе килү максаты аны элекке Свердловск (хәзерге Ека­теринбург) шәһәрендәге Урал урман хуҗалыгы институтына алып килә.1974 елдан ул үзенең тор­мышын Кама урман-сәнәгать хуҗалыгы белән бәйли. Башта Шомбыт урманчылыгында ур­манчы булып эшли. Яшь бел­геч урманнарны саклау, сани­тар кисү, иген кырларындагы ерымнарны урман үсентеләре утырту юлы белән туктату, агач материаллары әзерләү эшләрен уңышлы оештыру белән бергә җәмәгать эшләрендә дә актив катнаша. Соңрак аны тагын да җаваплырак эшкә - Кама урман- сәнәгать хуҗалыгына баш ур­манчы итеп куялар. Биредә ул хуҗалыкның данлыклы дирек­торы, Социалистик Хезмәт Ге­рое Иван Захарович Иванов кул астында эшләп чыныгу ала, 1992 елда остазы лаеклы ялга киткәч, директор вазифасына билгеләнә. Хуҗалыкның такта материаллары җитештерү, фа­нера, ДСП, көнкүреш товарла­ры эшләү кебек күптармаклы булуын исәпкә алсаң, аңа нин­ди колачлы бурычлар хәл итәргә туры килүен күзаллап була. Хезмәткәрләр өчен то­рак йортлар төзү дә көн када­гындагы мәсьәлә бит. Бу ел­лардагы хезмәтләре өчен күп мәртәбәләр республика урман хуҗалыгы министрлыгының Мактау грамоталары, Рәхмәт хатлары белән бүләкләнә, исе­ме Татарстан Республикасының Мактау тактасына кертелә.

  1. елда Татарстан Прези­денты М.Ш.Шәймиевнең Ука­зы нигезендә “Татарстанның атказанган урманчысы” дигән мактаулы исемгә лаек була.
  2. елда хуҗалык базасын­да Татарстан Республикасы урманчыларының беренче съезды үткәрелү дә күп нәрсә турында сөйли.

1995-1998 елларда Рәшит Таҗетдинов Татарстан Республикасының урман хуҗалыгы министрлыгында яңа технологияләр кертү бу­енча әйдәүче инженер булып эшли.

Туган якларга кайтасы килү үзенекен итә билгеле: 1998 ел­дан Рәшит абый Кызыл Йолдыз урман хуҗалыгы җитәкчесе булып эшли башлый. Биредә эшләгәндә дә хезмәт юлы күп кенә мәртәбәле бүләкләүләр белән үрелеп бара. Мәктәп музеендагы материалларны барлап утырам - ел саен ди­ярлек район башлыгының Рәхмәт хатлары, Мактау гра­моталары бирелгән; Татарстан Республикасы Министрлар Кабинетының Рәхмәт хаты да бар биредә. Ә 2003 елда Рәшит Фәләхетдин улы Таҗетдинов “Россия Федерациясенең атка­занган урманчысы” дигән мак­таулы исемгә лаек була. 2010 елда исә 40 елдан артык хезмәт куеп, лаеклы ялга чыга.

Лаеклы ялда вакытта да Рәшит абый тик тора белми: халык мәнфәгатьләре өчен кешеләргә рухи азык бирү, аларны тәрбияләү өлкәсендә хезмәт куярга алынды. Читтән торып Казан шәһәрендә мәдрәсә тәмамлап, үзе яши торган Камский бистәсендә имам-хатыйб вазифасын баш­кара. Мәктәп балалары кар­шында әхлак дәресләре үткәрә, берничә авылның имам-хатый- блары эшчәнлеген көйләүчебулып тора, балаларны рай­он күләмендә үткәрелә торган Коръән укучылар бәйгесенә әзерли, кыскасы, тулы канлы тормыш, актив эшчәнлек белән яши. Сүз уңаеннан, бу бистәдә 1994 елда мәчет төзелгән ва­кытта Кама урман хуҗалыгы директоры буларак ул шактый ярдәм күрсәткән була. Безнең Яңа Арыш авылы мәчетенә ян­корма төзегәндә дә шулай ук аның ярдәме зур булды.

Рәшит абый хәләл җефете Рәзинә апа белән өч бала тәрбияләп үстерделәр. Олы уллары - Илдар Рәшит улы, икътисад фәннәре кандида­ты, хәзерге вакытта Балык Бистәсе муниципаль районы башлыгы. Кызлары - Ильмира Казан финанс-икътисад ин­ститутын тәмамлап озак ел­лар Кама урман хуҗалыгыныңбаш экономи­сты булып эшли, хәзерге вакытта Камский бистәсе Советының сәркатибе. Кече кызлары Динара исә Төбәкара клиник-диагностика үзәгенең табиб- терапевты.

Кыска гына язмамда нинди генә эштә булса да алдына ныклы максат куеп, ты­рышып эшләгән шәхеснең пор­третына кайбер штрихлар гына өстәргә тырыш­тым. Әлбәттә, үсеп килүче буын бу хөрмәткә ия затлар турын­да белергә, алар үрнәгендә кы­енлыкларны җиңәргә, тулы канлы тормыш белән яшәүнең чын мисалла­рын күрергә тиеш. Шуны да ассызыклыйм әле: нинди генә дәрәҗәле урыннарда эшләсә дә Рәшит абый саф татар телендә сөйләште, үз фикерен төрле даирәләрдә, Президентыбыз каршында да җиткерә белде. Менә шундый шәхесләребез мисалында телгә сак мөнәсәбәт, милли җанлылык һәм фида­карь хезмәт нәтиҗәсендә ре­спубликада гына түгел, ә бәлки Рәсәй күләмендә дә таныла алу мөмкинлеген күбрәк яктырт­сак иде. Дамир Нәбиуллин, педагогика фәннәре кандидаты,Яңа Арыш урта мәктәбе директоры.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса
2
X