«Өчпочмаклы солдат хатлары...»
Минем өстәлемдә Бистәбезнең танылган кешесе, Татарстан Республикасының атказанган механизаторы, якташым, туганым Үзбәк абый Мусинның әтисе Габдрахман Хәйретдиновның авыр сугыш елларында, ут эчендә, окопларда һәм блиндажларда язылган солдат хатлары. Алар солдатның йөрәк түреннән чыккан хисләрен, уй-кичерешләрен ачык чагылдыралар. Хатлар инде вакытлар узу белән саргайганнар, еллар тузаны да кунган, кайберләренең сүзләрен дә танырлык түгел.
Шушы хатларның берничәсе белән сезне дә таныштырасым килә. Хатлар нөсхәдә, үзгәртелмичә бирелде.
ХАТ БАШЫ - ЯЗ КАРШЫ
(1944 елның 1 гыйнварында язылган)
“Сез ки хәләлем Фатыйхага без ки хәләлең Гәбдрахманнан бик сагынып вә бик саргаеп күп сәламнәремне җибәрәм. Шулай ук олы кызым Розига, кече кызым Минзифага сәлам җибәрәм. Әтиләрнең барчасына да бик сагынып күп сәлам диярсез...” Аннан барлык күрше-күлән, туган-тумачаларына исемнәрен атап яза ул. “Сез җибәргән хатны алдым. Укыгач бик сөендем. Күп мәгълүмат язгансыз. Бу хатымны озак язалмый тордым. Чөнки Кировград өчен дошман белән бик каты сугышырга туры килде. Бер авыл аша чыкканда кинәт дошман самолеты бомбага тотты. Иң олы начальникларыбыз, күп кенә иптәшләребез һәлак булды. Мин менә үзем бер хахулның базына төшеп исән калдым, сезнең бәхеттәндер инде. ....Ничә тапкыр сорап яздым, ә син җавап язмыйсың. Пособие акчасын аласыңмы, юкмы, колхоздан бераз ярдәм бармы, икмәк бирәләрме, шул хакта яз әле ...”
НИ ХӘЛЛӘРДӘ ЯШИСЕЗ?
(1944 елның 23августында язылган)
“...Үзегез нихәлдә яшисез?....Бәрәңгеләр нихәлдә, яхшы булыр төсле күренәме?...Үзең эшкә йөрисеңме, кыр эшенәме, әллә берәр төрле башка эшкәме? Балалар нишләп йөриләр, өйдә калалармы?...Колхоз эш өстендә бераз колхозчыларга ашарга авансы бирәме, юкмы?...Мин сездән апрельдән бирле бер хатыгызны да алган юк. Августта гына бишенче хатым инде бу. ...”
Дәвамын газета битләрендә укый аласыз
Автор Рәзилә Мөхәммәтрәхимова.Яңа Арыш авылы.
Следите за самым важным и интересным в Telegram-каналеТатмедиа