Югары Тегермәнлек мәктәбендә әдәби музей-кунак йорты ачылды

Тантанада Татарстан Республикасы Рәисе каршындагы мәдәниятне үстерүгә ярдәм фондының башкарма директоры Нурия Хашимова һәм Татарстан Республикасының мәгариф һәм фән министры урынбасары Минзәлия Закирова  катнаштылар.

  Берничә өлештән торган программа кысаларында сугышчан һәм хезмәт дан музее җитәкчече Илфар Габдрахманов килгән кунаклары музейның тарихы, Бари Шәвәлиевнең тормыш һәм сугышчан юлы белән, яшь буынны тәрбияләүдә туган як тарихын өйрәнүнең әһәмияте турында сөйләде. Шуның белән параллель рәвештә татар теле һәм әдәбияты укытучысы Рушания Кәбирова ачык дәрес үткәрде.

Югары Тегермәнлек мәктәбе коллективы мәгариф министрлыгының грантын отып биредә әдәби-мәдәни музей-кунак йорты оештыра. Аны ачу тантанасы шушы авыл егете, «Өметлеләр» мәчете имам-хатыйбы, Россия ислам университетының гарәп теле укытучысы Алмаз хәзрәт Сафинның азан әйтүе белән башланып китте.

  Әдәби музей-кунак йортын ачу хокукы Нурия Хашимова һәм Минзәлия Закировага бирелде. Кызыл тасма киселгәннән сон барысы да матур,  заманча, зәвык белән эшләнгән музейга үттеләр.

- Гасырдан артык тарихы булган Югары Тегермәнлек мәктәбе югары мәдәниятле, тәрбияле балалар үстерүдә күп көч куя. Безнең туган авылда  үзләренен  һөнәри юлын иҗат белән бәйләгән шәхесләр бихисап, - дип башлады чарны алып баручы тәрбия эшләре буенча  директор урынбасары Гүзәлия Закирова һәм сүзне Нурия Хашимовага бирде.

- Равил Фәйзуллинның туган авылында аңа багышланган музей ачкан идек, шуның дәвамы булып  әдәби-мәдәни  йорт булдыргансыз, шуның өчен бик зур рәхмәт сезгә. Укытучыларның эшләре аеруча җаваплы, игелекле. Республика җитәкчесе Рөстәм Миңнеханов, мәгариф министры Илсур Хадиуллин тарафыннан укытучыларга, гомумән республикада яшәү һәм эшләр өчен бөтен шартлар да тудырылган, - диде  Нурия Хашимова якташлары очен горурланып.

   Минзәлия Закирова мәгариф һәм фән министрлыгы исеменнән  укытучыларны, мәктәп директорларын, авылдашларын сәламләде һәм үзенең чыгышын бөек мәгърифәтче Шиһабедтин Мәрҗәни сүзләре белән башлап җибәрде.

  – Бала чакта алган тәрбияне сонынан барлык  дөнья халкы да үзгәртә алмый.  Шуңа да мин рәхмәтлемен үзебезнең укытучыларыма, мине һәрдаим тәрбияләгән әниемнең гадилегенә, әтиемнең батыр йөрәгенә, әби-бабаларымның иманына.  Бу мәктәп балалары күркәм холыклы, акыллы, тәрбияле булып яшәсеннәр иде,  - диде ул һәм  Татарстан Республикасының мәгариф системасының 100 еллыгына багышланган китапны бүләк итте. Анда бу өлкәдә эшләгән иң күренекле шәхесләр, шул исәптән безнең район кешеләре турында  да язылган.

 Музейда укытучы Рамазан Кәбировка, аның тормыш һәм иҗат юлын чагылдырган әсбаплар, Татарстан Республикасының мәгариф һәм фән министры урынбасары Минзәлия Закирова, Татарстанның атказанган мәдәният хезмәткәре, Татарстан язучылар берлеге әгьзасы Вазыйх Фатыйхов, илебез алга китсен өчен гаҗәеп көч керткән, күп мактаулы исемнәргә лаек булган Рахман Шафигуллин, Татарстанның атказанган мәдәният хезмәткәре, шагыйрә Рәсимә Гарифуллина, үткен каләмле, зирәк фикерле журналист Мансур Мортазин, укытучы, тарихи китаплар авторы Илфар Габдрахманов турында мәгүлүмат урнаштырылган. Алар барысы да чарада катнашып шушы мәктәптә белем алганнары белән горурланып чыгыш ясадылар һәм үзләренең истәлекләре белән бүлештеләр.

   Югары Тегермәнлек авылынын башка күренекле шәхесләре турында матур итеп эшләнгән стена альбомнарында язылган.

    Чараның икенче өлешендә Минзәлия Закирова мәгариф системасында булган яңалыклар турында сөйләде. Мәктәп директоры Рафис Минһаҗев, аның урынбасары Фәнзил Шәмсевәлиев  коллектив эшчәнлеге белән таныштырдылар.

Әлеге чара Халыкара туган тел көненә дә багышланган иде.

Туган телебезгә күп кешеләрнен хезмәте сыйган. Туган телдә бик күп шигырьләр иҗат ителгән.

Шушы мәктәпне яхшы билгеләренә генә тәмамлаган, бала чактан ук әдәбиятка гашыйк булган, журналист, Татарстан Республикасы Язучылар һәм Журналистлар берлеге әгъзасы, яшь шагыйрә Дания Нәгыйм  шушы көннәрдә Муса Җәлил премиясе лауреаты исеменә лаек булды. Бүгенге көндә ул  Татарстан радиосында эшли. Шундый талантлы шәхес үстергән татар теле  һәм әдәбияты  укытучысы Рушания Кәбирова укучысының мәктәптә укыганда язган шигырьләрен  бүгенге конгәчә саклап килгән. Мәктәп укучылары аның ижат юлы турында сөйләделәр.

   Дания Нәгыйм иң элек  укытучысына, чыгыш ясаган мәктәп балаларына  рәхмәтен белдерде. Яшь язучы Алинә Бикмуллина белән берлектә язган китабын бүләк итеп алып килгән.

Татар милләте өчен жан атып торган шагыйрә “Татар теле ” исемле шигырен хискә бирелеп күңеле белән укып китте.

Чара  "Туган тел" жыры белән тәмамланды. Шул минутларда  һәркем туган теле,  туган жире өчен горурлык хисе кичерде.

Таңсылу Минһажева.