Бөтендөнья татар конгрессының Балык Бистәсе бүлеге утырышы узды

 Утырышны Бөтендөнья татар конгрессының Балык Бистәсе муниципаль районы бүлеге җитәкчесе Касыймова Илвера Шириаздан кызы алып барды. Чарада Балык Бистәсе Башкарма комитетының социаль-мәдәни бүлеге җитәкчесе Кәримуллина Лилия Венер кызы, «Ак калфак» татар хатын-кызлары җирле оешмасы җитәкчесе Рәшитова Рәхимә Габдулхан кызы, җирле оешманың активы катнашты.
Чара башында Илвера Касыймова 2024 елга йомгак ясап, башкарылган эшләр хакында бәян итте, оештыру эшләре буенча мәсьәләләр хакында җиткерде. Районкүләм уздырылган  бәйгеләр, чаралар турында да әңгәмә корып, һәрбер кеше үз фикерләрен җиткерергә ашыкты.
Бүлек җитәкчесе Илвера Касыймова матурлык тудыручы Лилия Габдулловнага ихлас рәхмәтләрен җиткерде. Шәхсән үзем дә Татар конгрессы оештырган  бәйгеләр турында сөйләдем.
Югары Тегермәнлек  мәктәбенең тарих укытучысы, Бөтендөнья татар конгрессы Башкарма комитеты каршындагы татар төбәкчеләренең Советы әгъзасы Илфар Габдрахмановның чыгышы да бик эчтәлекле булды. 
Татарстан Республикасының атказанган мәдәният хезмәткәрләре, якташ шагыйрьләребез Вазыйх Фатыйхов, Рәсимә Гарифуллина иҗат җимешләре белән сөендерде.
​Балык Бистәсе районы мөслимәләр берлеге җитәкчесе Иделия Мәхмүтованың чыгышы күпләребезне таң калдырды. Мәчетләребездә дә бик күп эшләр башкарылып килә.
Мәдәният бүлеге җитәкчесе Лилия Кәримуллина республика күләмендә узган "Бистә шәле" , Кукмара районында узган "Кукмара итекләре"фестивалендә җиңүләре турында сөйләп , "Бистә итеге" н әзерләгән кызларга рәхмәтен җиткерде.
Соңыннан Илвера Шириаздан кызы киләчәктә тормышка ашырасы планнар белән таныштырды. Алга таба да очрашулар еш кабатлануын, фикер алышулар дәвамлы булуын теләде.

Тулырак вариантын «Авыл офыклары» газетасы битләреннән укый алырсыз. 

Рәзилә Мөхәммәтрәхимова.