Балык Бистәсе игенчеләре аяз көннәрне нәтиҗәле файдаланалар

Районыбыз игенчеләре табигать биргән форсатны кулдан ычкындырмаска, аяз көннәрне нәтиҗәле, җитештерүчән хезмәт белән файдаланып калырга омтылалар инде.

«Кулон- Агро» хуҗалыгында урак оешкан төстә бара. Игенчеләр 1500 гектар мәйданда бөртеклеләрне җыеп алганнар инде. Хуҗалык уңганы Айдар Камалиев “Класс-Тукано” комбайны белән 900 тоннадан артык ашлык суктырып алган . Дамир Гарипов ( “Класс-Тукано”)-870, Илдус Гайнетдинов (“Нью-Холланд”) 650 тонна суктырганнар.

Радик Хәсәнов, Айнур Гыйлемҗанов, Владимир Новиков та лидерлардан калышмаска тырышалар.

-Көзге культураларны, солыны тулысынча җыеп бетердек инде. Бүгенге көндә арпа суктырабыз. Әлегә уртача уңыш гектарга 32 центнерны тәшкил итә. Аерым участоклар 40 центнердан артык уңыш бирде,- ди хуҗалыкның баш агрономы Камил Галимуллин.

Урып-җыю белән беррәттән башка агрочараларны да чиратка куймыйлар кулонлылар. Пар җирләрен эшкәртүне төгәлләгәннәр. Көзге чәчүгә әзерлек бара.

Рәсемдә: Айдар Камалиев.