Яшәрдек, матурайдык

Клуб оешуның беренче көненнән аны элек озак еллар гимназиядә хезмәт куйган Нина Мусина җитәкли. Ул иҗат көче белән бик мавыгып шөгыльләнә.
-Мондый клуб ачу турында мин мәктәптә эшләгән вакытта ук хыялландым. Ниһаять андый мөмкинлек тә туды. Спорт комплексы директоры Рәмзия Валеева тәкъдим ясагач бик теләп ризалаштым һәм кешеләрне туплый башладым. Безнең "Сәламәт бул" клубына бүген 30 дан артык кеше йөри. Һәрберебез өчен тормыш активлыгы, сәламәтлекне ныгыту, әлбәттә инде үзара аралашу иң мөһиме,-ди ул. Ә клубта барысы да хатын-кызлар. Дәрескә алар атнага ике мәртәбә җыелалар. Алар белән фитнес һәм аэробика буенча тренер Елена Долгих шөгыльләнә.
-Организмны сәламәтләндерү безнең төп бурычыбыз. Без монда дөрес сулыш алырга, эмоциональ киеренкелекне бетерергә һәм кәефне күтәрү алымнарына өйрәнәбез. Сер түгел, һәрбер хатын-кыз нинди яшьтә булуына карамастан, сәламәт, матур һәм төз гәүдәле булырга тырыша. Миңа алар белән эшләве бик ошый,-ди Елена Владимировна.
Фитнес залда төрле тренажерлар белән эш иткәннән соң хатын-кызлар бассейнда ирекле йөзү белән шөгыльләнәләр. Ә клубта эшләр моның белән генә чикләнми. Һәр атнаның пәнҗешәмбесендә төрле юнәлешләр буенча дәресләр үткәрелә. Анда Казан шәһәре белгечләре катнаша. Ризыклар әзерләү, бәйләү, косметик чаралар белән дөрес эш итү буенча мастер-класслар үткәрелә. Үзәк китапханәләр системасы хезмәткәрләре монда зур булышлык күрсәтәләр. Алар төрле тематик күргәзмәләр оештыралар, файдалы мәгълүматлар белән тәэмин итәләр.
Ә клубка йөрүче өлкән яшьтәгеләрнең һәрберсе үзенчә сәләтле. Алар төрле тармакларда хезмәт куйганнар, үзләренең актив тормыш позицияләре бар. Биредә үз сәләтләре белән уртаклашалар. Анна Кильянованың чигеп эшләнгән картинасы гына ни тора. Зоя Николаеваның кул эшләре дә сокланырлык. Халыкара хатын-кызлар бәйрәме уңаеннан да клубка йөрүчеләр үз кул эшләре күргәзмәсе оештырдылар. Бәйрәм бик күңелле үтте. Светлана Кутлина, Гәүһәрия Галимова, Любовь Сычева укыган шигырьләрне тын да алмыйча кызыксыну белән тыңладылар. Клубка йөрүчеләрне спорт комплексы директоры Рәмзия Валеева беренче яз бәйрәме белән котлап, изге теләкләрен җиткерде.
«Бирегә йөри башлагач без без үзебезне яшәреп киткәндәй тойдык, күңелләр күтәрелеп, гәүдәләр җиңеләеп киткәндәй булды. Үзебезне лаеклы ялда булуыбызны да онытттык». Клубка йөрүчеләрдән әнә шундый рәхмәт сүзләрен күп ишетергә туры килде безгә. Бәйрәм, әлбәттә инде, чәй табыны артында тәмамланды. Хатын-кызлар бер-берсен котлап бүләкләр тапшырдылар. Өлкән буын вәкилләре әнә шулай вакытларын файдалы һәм кызыклы итеп үткәрәләр.
Рәсемдә: дәрес вакыты.

Реклама