Узган шимбә, якшәмбе көннәрендә район үзәгенең яңа стадионында республикабызның авыл районнары арасында җиңел атлетика буенча 9 нчы Спартакиада булып узды. Мондый дәрәҗәдәге ярышлар безнең районда беренче мәртәбә генә үткәрелә әле.
Соңгы вакытта безнең районда республикакүләм зур ярышлар еш үткәрелә. "Дельфин" спорт-сәламәтләндерү комплексы һәм футбол стадионы төзелгәч, балыкбистәлеләр иң югарылыктагы спорт ярышларын үткәрү мөмкинлеге алдылар. Бу районның абруен күтәрү белән беррәттән спорт һәм физкультураны үстерүгә зур этәргеч ясый.
Җиңел атлетика Спартакиадасына республикабызның 22 районыннан 200 гә якын спортчы килгән иде. Алар арасында Чистай, Питрәч, Балтач, Арча, Саба, Яңа Чишмә һәм Татарстанның башка район вәкилләре бар.
Командаларның тантаналы парады шимбә көнне үткәрелде.
-Без Балык бистәсе җирендә кадерле кунакларны-республикабызның авыл районнары спортчыларын сәламләвебезгә шатбыз,-диде район башкарма комитеты җитәкчесенең социаль мәсьәләләр буенча урынбасары Р.Хәбибуллин. -Безнең районда спортны үстерүгә зур игътибар бирелә, без данлы спорт традицияләребез белән горурланабыз. Якташларыбыз арасында дөнья чемпионнары, олимпия уеннары призерлары, Татарстан, Россия чемпионнары, халыкара ярышларның призерлары бар. Әмма безнең өчен рекордлар һәм җиңүләрдән бигрәк үсеп килүче буыннын сәламәтлеге мөһим. Спорт уңышлары, җиңүләр телим сезгә.
Республика "Уңыш" физкультура-спорт җәмгыяте җитәкчесе В.Мәхмүтов хуҗаларны җылы кабул иткәннәре, ярышларны югары дәрәҗәдә оештырганнары өчен рәхмәтен белдерде. Ул Балык бистәсенең йөгерү юлларында җиңгән спортчыларның Уфада узачак "Уңыш" җәмгыятенең Бөтенроссия Спартакиадасында катнашачакларын белдерде.
Егетләр һәм кызлар 3000 метр, 1500 метр, 800 метрга йөгерүдә, 4 х 400 метрга эстафетада ярыштылар. Йөгерүчеләр арасында спорт мастерлары һәм мастерлыкка кандидатлар да бар иде. Балыкбистәлеләргә алар белән ярышу авыр булды, әлбәттә. Әмма шулай да безнең команда 22 район арасында 9 нчы урынны алды. Ә иң җитезләр булып Актаныш спортчылары танылдылар. Аксубайлылар-икенче, арчалылар өченче булдылар.
Бу Спартакиада безнең районда да спортның җиңел атлетика төрен үстерүгә этәргеч бирер дип ышанабыз.
Хуҗалар кунаклар өчен мәдәни программа турында да онытмаганнар. Шимбә кичендә стадионда районның иң яхшы үзешчәннәре катнашында концерт булды.
Рәсемдә: йөгерү юлында.
Иң мөһим һәм кызыклы язмаларны Татмедиа Telegram-каналында укыгыз
