Һәр җирлекнең батырлары җыелды

Күгәрчен мәктәбе базасында узган әлеге олы бәйгедә Күгәрчен, Юлсубино, Түбән Тегермәнлек, Олы Кульга һәм Урахча авыллары спортчылары катнаштылар. Район җитәкчелеге исеменнән муниципаль район башкарма комитеты җитәкчесе урынбасары Рәсим Җамалиев тәбрикләү сүзендә авыл җирлекләреннән килгән егет һәм кызларга спорт белән дус булырга һәм зона бәйгеләрендә генә түгел, район, республикакүләм ярышларда да актив катнашырга чакырды. Спартакиадада һәрберсенә сөенечле җиңүләр теләде. Ярышларга авыл җирлекләреннән йөздән артык спортчы килгән иде. Ә болары инде авыл җирлеге җитәкчеләренең яшьләрне даими барлавы, аларның нәрсәгә сәләтле булуларын ачыклауларына бәйле. Шуңа ярышлар киеренке шартларда узды. 24 килограммлы герне 60 мәртәбә чөеп Күгәрчен егете Раил Мөхәммәтҗанов җиңү яулады. Волейбол ярышында да күгәрченлеләр өстенлеккә иреште. Ә менә иң көчле шахматчы исеме өчен көрәшүчеләр бик күп иде. Югары Тегермәнлектән Илдус Ханов, Урахчадан Виктор Никитин, Олы Кульгадан Вера Безрукова, Исрафиль Зыятдинов, Рәүф Һашимов кебек спортчыларның көч сынашуларын күзәтергә авыл кешеләре дә килгән иде. Әмма беренчелекне Урахчадан Виктор Никитин яулады. Ә хатын-кызлар арасында Ямаштан Алисә Кәримова көчле шахматчы, шушы ук авылдан Гөлназ Гатиятова шашка буенча җиңүче булып танылдылар. Өстәл теннисы буенча ярышлар Ямаштан Гөлчәчәк белән Рәмзил Нуретдиновларның җиңүе белән тәмамланды. Ә менә командалар арасында беренчелекне күгәрченлеләр яулады. Икенче-өченче урыннарны Юлсубино белән Түбән Тегермәнлек җирлекләре командалары бүлештеләр. Барлык җиңүче командаларга тантаналы төстә Дипломнар һәм акчалата бүләкләр тапшырылды. Бу бәйгене үткәрүгә Күгәрчен авылында төзелүче ит комбинаты дирекциясе иганәчлек ярдәме күрсәтте.
Рәсемнәрдә: спартакиададан күренешләр.

Реклама