Боз өстендә җылылык

Шимбә көнне иртәдән карлы буран бар җирне дә томалады. Ярышны оештыручылар инде бәйгене үзгәртү турында уйлый башладылар. Әмма хоккей ярышын кичектермәскә дигән карарга килделәр. Иртәдән тукталмаган буран да, мөгаен, ярышта катнашучылар санын беркадәр киметүгә үз өлешен керткәндер. "Дельфин" спорт комплексы янәшәсендәге хоккей мәйданчыгына нибары 5 команда чыкты. Алар арасында Балык бистәсе унитар предприятиесе, "Агрохимсервис", Күгәрчен, Ямаш, Тегермәнлек җыелма командалары бар иде. Уен башында ук балыкбистәлеләр Ямаш командасы белән көч сынашты. Алар икесе дә шактый көчле һәм ныклы әзерлекле иде. Киеренке бәйгедә җиңү балыкбистәлеләргә елмайды. Ә финал ярышында алар "Агрохимсервис" командасын җиңделәр. Ә өченче урынга күгәрченлеләр лаек булды. Җиңүчеләргә Кубокны муниципаль район башлыгы урынбасары Рөстәм Гыйльманов тапшырды. Ул районыбызда хоккей сөючеләр саны елдан-ел артуын билгеләп үтте. Шулай ук яшьләребезнең башка спорт төрләрен дә үз итүләренә сөенечен белдерде.
Әлеге ярышның иң яхшы уенчысы булып "Агрохимсервис"тан Нияз Кәримуллин танылды. Балык бистәсе унитар предприятиесеннән Олег Мамаков иң яхшы капкачы исеменә лаек булды. Ярышның иганәчесе Руслан Дормидонтов ("Регион 16 ҖЧҖ") Ямаш авылы хоккейчылары өчен махсус бүләкләр әзерләгән.