Авылдашыбыз истәлегенә
Бертуган Гыйлметдиновлар кубогына үткәрелә торган хоккей ярышлары Ямаш халкы өчен чын мәгънәсендә көтеп алынган бәйрәмгә әйләнде. Районның хоккей сөючеләре быел 8 нче мәртәбә бирегә җыелды. Төрле авыллардан иң көчле 6 команда килгән иде. 1998 елда туган укучылардан торган Балык бистәсе "Дельфин", спорт мәктәбе, Ямаш, Котлы Бөкәш, Юлсубино һәм Күгәрчен мәктәпләре...
Бертуган Гыйлметдиновлар кубогына үткәрелә торган хоккей ярышлары Ямаш халкы өчен чын мәгънәсендә көтеп алынган бәйрәмгә әйләнде.
Районның хоккей сөючеләре быел 8 нче мәртәбә бирегә җыелды. Төрле авыллардан иң көчле 6 команда килгән иде. 1998 елда туган укучылардан торган Балык бистәсе "Дельфин", спорт мәктәбе, Ямаш, Котлы Бөкәш, Юлсубино һәм Күгәрчен мәктәпләре яшь спортчылары Ямаш урта мәктәбе хоккей мәйданчыгында үзләренең осталыкларын күрсәттеләр. Һәр елдагыча уенны карарга авыл халкы күп килгән иде. Көн уртасында башланган ярышлар карангы төшкәнче дәвам итте. Юлсубино һәм спорт мәктәбе командалары уенын күзәткән җанатарларның хисләр ташкыны уенчыларның учагына ялкынны өсти торды. Бу бәйгедә Юлсубино командасы үзенең ярышларга ныклы әзерлек белән килгәнлеген күрсәтеп 4:2 исәбе белән отты һәм 3 нче урынга чыкты. Ә иң кызыгы, Ямаш белән "Дельфин" командалары арасындагы көрәш булды. Ул ямашлылар файдасына 4:3 исәбе белән тәмамланды һәм күчмә кубок боз хуҗаларында калды. Уеннарда иң яхшы һөҗүмче дип Ямаш командасыннан Зөлфәт Ямалиев, иң яхшы сакчы-Алмаз Хәмәтханов (Юлсубино), иң яхшы капкачы-Салават Хәбибуллин «Дельфин» билгеләнделәр. Турнирның иң яхшы уенчысы-Раил Зәйнетдинов (Ямаш). Ярышта шулай ук матур уен үрнәге күрсәтүче Никита Столяровка ("Дельфин") Илнур Хамматов махсус бүләген тапшырды.
Ярышлар тәмамлангач яшь хоккейчылар мәктәп музеенда булдылар. Марат Кәлимуллин истәлегенә багышланган экспозиция укучыларда аеруча зур кызыксыну уятты. Алар Маратның үзе исән чагында уйнаган кәшәкәсен, спорт киемнәрен үз куллары белән тотып карадылар.
Авылдашлары өчен җан аткан һәм аларның хөрмәтен казанган бертуган Гыйльметдиновлар яшьләрне сәламәт яшәү рәвешенә өндәгән мондый бәйгеләр киләчәктә дә дәвам итәчәген белдерделәр.
Следите за самым важным и интересным в Telegram-каналеТатмедиа
Нет комментариев