Авыл офыклары
  • Рус Тат
  • Шушы көннәрдә Яңа Арыш авылы җирлегендә мобиль төркем эшләде

    Төркем составында Балык Бистәсе районы башкарма комитеты җитәкчесенең социаль мәсьәләләр буенча урынбасары Айгөл Вафина, Халыкка социаль хезмәт күрсәтү "Доверие"-"Ышаныч" үзәге белгече Ольга Рагимова, район үзәк хастаханәсе врач-терапевты Николай Демьянов, шәфкать туташы Гөлсинә Хөснетдинова, Пенсия фондыннан әйдәүче белгеч  Рәмзия Зәкиева, үзәк даруханә мөдире   Гөлфия Муксинова бар иде.

    Алар мәдәният йортында авыл кешесенең  иң борчыган сорау-үтенечләрен кабул иттеләр.  Максатлары -  халыкның яшәешен, аларны борчыган проблемаларны өйрәнү иде.  Халык очрашуга бик теләп килде. Авылдашыбыз Фирдәүсә апа Хөсәенова:
    - Аллага шөкер, авылыбызда барлык мөһим социаль объектлар бар: клубыбыз, мәктәп, балалар бакчасы, китапханә гөрләп тора. Фельдшер-акушерлык пункты, почта, кибетләр дисеңме… Яшәү, көн күрер өчен бөтен шартлар тудырылган, алга таба да дөньялар имин булып, шушы юнәлештән тайпылмасак иде, - ди.
    -Хәзерге тормышыбыз бик яхшы, мохтаҗлык кичермибез. Ләкин сугыш чорында күргән авырлыклар, балачакта, яшьлектә, күргән михнәтләр һаман онытылмый, - ди Габдуллаҗан абый Вәлиев. 
     Авылда даруханә юклыкны һәм башка мәсьәләләрне дә күтәрде халык.
    Шулай ук юлламалар, ташламалар хакында да сораулар күп булды. 
    Нәфига апа Галимова: “Өлкән кешеләргә, ялгыз яшәүчеләргә автоматлаштырылган янгын кисәтү сигнализациясен (АПС) урнаштырсалар иде”, - дигән тәкъдим белән чыкты. 
    Ике сәгатьтән артык очрашуда һәрбер сорау-мөрәҗәгать язмача теркәлеп барды. 
    -Сорауларның берсе дә игътибардан читтә калмый, аларның барысы да алга таба уңай хәл итүне күздә тота, - диде Айгөл Вафина. Авыл халкы мондый эшлекле очрашулар киләчәктә дә дәвам итсен иде, дигән теләктә калды.

    Рәзилә
    Мөхәммәтрәхимова.


     

    Нравится
    Поделиться:
    Реклама