Тыгыз элемтәдә эшләргә кирәк

Масловка, Котлы Бөкәш, Күгәрчен авыл җирлекләре территорияләрендә хокук тәртибен бозуларны профилактикалау буенча җирле үзидарә органнарының эшчәнлеге турында отчет белән җирлек башлыклары А.Егоров, И.Фәтхетдинов, А.Сафин чыгыш ясадылар. Алар хокук тәртибен бозуларны профилактикалау буенча эшнең план нигезендә, системалы рәвештә алып барылуын билгеләп үттеләр. Тәртипсез гаиләләр һәм КДН, полициядә исәптә торучы, социаль куркыныч хәлдә яшәүче үсмерләр аерым игътибар үзәгендә тотылалар. Хокук тәртибен бозуларны профилактикалу мәсьәләләре совет утырышларында, авыл җыеннарында, ата-аналар җыелышларында даими рәвештә каралалар. Балаларны төрле түгәрәкләрдә, спорт белән шөгыльләнүгә тарту буенча максатчан эш алып барыла. Авылда социаль-икътисадый тормышның тотрыклылыгы бу юнәлештә мөһим фактор булып тора.
Район эчке эшләр башлыгы урынбасары Р.Фәхретдинов авыл башлыкларына ирекле халык дружиналарының (ДНД) эшчәнлеген активлаштыру кирәклеген искәртте. Күп урыннарда аларның кәгазьдә генә булуын билгеләп үтте.
Сүз дә юк, яшьләр арасында җинаятьчелек һәм хокук бозуларга каршы көрәштә спорт белән шөгыльләнү зур урын алып тора. Беренче чиратта бу балаларга һәм яшьләргә кагыла. Районыбыздагы спорт оешмаларының бу юнәлештәге эшчәнлеге турында яшьләр сәясәт, спорт һәм туризм бүлегенең әйдәүче белгече Н.Хәмидуллина тәфсилләп сөйләде. Сәламәт яшәү рәвешен пропагандалау, балаларны рухи-әхлакый яктан тәрбияләү, алкоголизм, наркоманияне профилактикалау буенча комплекслы эшләр барышы турында район Мәдәният йорты директоры Ф.Әхмәтҗанова чыгыш ясады.
Ахырда хокук тәртибе бозуларга юл куймау буенча профилактик эшне көчәйтү, активлаштыруга юнәлтелгән карар кабул ителде. Анда комиссия утырышы барышында әйтелгән тәкъдимнәр исәпкә алынды.
.